Diadomngo 26 november 2023, Aruba Amateur Weightlifting Association a teni nan Magno Evento cu ta e Campeonato Nacional di Hisamento di Peso cu a tuma luga den Compleho Deportivo Frans Figaroa na Noord.
Presente n’e Campeonato Nacional di Hisamento di Peso tabata Minister di Deporte Endy Croes, cu a duna un discurso y a desea tur e atletanan hopi exito den nan competencia.
Den e Campeonato aki tabatin participacion di 23 atleta den categoria di masculino y femenino cu ta bin di e clubnan E2REP Fitness, BFN Crossfit, Paradise Strength Aruba , TNT Gym y tambe algun atleta di Team Corsou a participa den e evento aki.
Nos por bisa hopi di e atleta a competi riba nivel y varios atleta a sa di kibra nan propio record y algun a logra hasta di kibra record nacional di Aruba den nan categoria.
A entrega medaya n’e atletanan cu a sali campeon di Aruba den nan categoria y trofeo a bay p’e tres miho atletanan cu t’e ganador absoluto di e Campeonato Nacional di Aruba den categoria di Youth, Junior, Senior y Master.
Den categoria di masculino Junior, trofeo a bay na prome luga pa Laertes Araque di TNT Gym y secundo luga pa Arnellyson Doran di Corsou. Trofeo den categoria di Senior a bay na prome luga pa Kevin Cayama di PS, di dos luga a bay pa Osmar Bislip di BFN CF y di tres luga pa Zyqion Soekandar di PS. Trofeo pa prome luga den categoria di master a bay pa Rene Rudel di PS, di dos luga a bay pa Jose Balbino III di PS y di tres luga a bay pa Eduardo Arias Solano tambe di PS.
Den categoria di femenino trofeo den categoria di Youth a bay na prome luga pa Caytlynne Lanoy di TNT Gym y di dos luga pa Chantal Mousalli di TNT Gym. Den Junior trofeo a bay na prome luga pa Farelies Sint Jacoba di Corsou y di dos luga pa Giva-Viviana Comenencia di BFN CF.
Den categoria di Senior a bay na prome luga pa Nataly Geerman di TNT Gym, di dos luga a bay pa Nicky Garcia di E2REP y di tres luga a bay pa Andrea Galindo di TNT Gym. Den categoria di Master trofeo na prome luga a bay pa Marcela Benavudes di PS, di dos luga pa Fabiola Vasquez di PS y di tres lugar a bay pa Dianie Croes di TNT Gym.
Emiterio Bareño, un baluarte den e deporte di peso y Herve Ruiz di Raad van Bestuur SSA, a haci entrega di trofeo y medaya.
Aruba Amateur Weightlifting Association ta manda palabra di gradicimento na tur e atleta y e clubnan pa nan participacion y pabien tambe n’e atletanan cu a kibra nan record personal y tur cu tabata involvi den e evento aki t’e voluntarionan, entrenador y e publico cu apoya e atletanan te na final pa esaki bira uno exitoso.
Pa no lubida palabra di gradicimento ta bay n’e sponsornan di e Campeonato Nacional cu ta Stichting Sportsubsidie Aruba, Lotto pa Deporte y High Performance Aruba.
