Entrante 15 di maart 2023, Departamento di Relacion Exterior/Directie Buitenlandse Betrekkingen (DBB) Aruba, ta conoce un director nobo den persona di Jocelyne M.M. Croes. E ta e prome hende muhe pa desplega e funcion aki y ta sigui Edwin Abath cu a bay cu pensioen aña pasa.
Mester menciona cu varios ex-Minister Plenipotenciario a solicita pa e funcion, pero e comision di reclutacion a haya cu Jocelyne ta esun miho prepara, mas capacita y mas integro pa por ocupa dicho funcion.
E proceso pa nombra un director nobo pa DBB, a inicia aña pasa. Mas di 20 persona a aplica pa e funcion aki y a cumpli cu tur rekisito necesario y mas, pa por desplega e funcion aki.
Jocelyne Croes tin un trayectoria amplio y largo den gobierno, den ramo internacional y mundo diplomatico, cu un enfoke den cooperacion entre pais y organisacionnan internacional.
Jocelyne Croes a traha desde aña 2002 den varios funcion den gobierno di Aruba y a fungi como Minister Plenipotenciario pa Aruba na Merca entre januari 2008 y augustus 2014.
Prome cu el a cuminsa traha pa gobierno di Aruba, el a traha entre otro pa e organisacion di Nacionnan Uni na New York, Africa y Azia. Jocelyne Croes a studia politicologia y relacion internacional na Merca, Francia y Hulanda.
Manera conoci, Aruba ta un pais cu un orientacion internacional. COVID a mustra di un forma nunca antes bisto con nos mundo ta interconecta y alabes con Aruba por optimalisa solucionnan y ta resiliente via relacion internacional na momento di desafionan grandi asina.
Den e caudro aki, DBB ta hunga un papel hopi importante y un cu lo sigui aumenta di importancia den e añananan nos dilanti, considerando e desaroyonan na nivel mundial.
DBB ta desplega un rol clave tambe pa locual ta regarda cooperacion den Reino, relacion entre diferente paisnan y organisacionnan internacional. P’esey ta importante pa tin un director cu tin experiencia amplio y conocemento relevante di e prioridadnan pa cu e cartera internacional y desaroyonan di pais Aruba.
Alabes ta importante pa e persona cu ta encarga cu e tarea di director tin un bon netwerk na nivel local, internacional y ta altanto di e ultimo desaroyonan na nivel global, pa Aruba keda activo y amplia su rol na nivel internacional.
Relaciona cu su nombracion, Jocelyne Croes a expresa: “Den e funcion di director di DBB, mi ta desea pa sigui pone na disposicion mi experiencia, conocemento y habilidadnan. Cu mi netwerk extenso di decadas, den funcionnan similar, lo mi percura pa sigui crea oportunidadnan y yega na resultadonan concreto pa Aruba. Mi ta disfruta di traha pa mi pais y den mi cargo nobo como directora di DBB, lo sigi haci esaki cu e conviccion cu mi conocemento y netwerk amplio lo facilita e tarea mi dilanti pa keda sostene Aruba y su desaroyo”
Den su trayectorio como profesional Jocelyne Croes a traha riba temanan di siguridad, desarmamento, igualdad di genero, enseñanza, energia, desaroyo economico y financiero, desaroyo social y sostenibel. El a percura pa crea oportunidadnan pa pais Aruba, a representa gobierno di Aruba na nivel internacional, a negocia acuerdonan y tratadonan internacional y ta conoci di ta pro-activo y pa “get things done”.
Jocelyne Croes a keda mantene su mes hopi activo na nivel internacional, locual ta refleha den su membrecia recien den e Conseho Global di Parnership (SDIG17) di OECD y gobierno di UAE y di Asociacion di Nacionnan Uni pa Region Caribense, pa por logra e metanan mundial den desaroyo sostenibel di un forma coherente y efectivo.
Considerando e experiencia y conocemento amplio di Joycelyne Croes, tin tur confiansa cu e lo desplega un bon trabao.
