Diasabra henter dia tabatin basta movecion na e edificio bieu di Citgo Caya Grandi. Debi na plannan di ampliacion riba mesa, a dicidi di basha e edificio abou.
A combersa cu Mariela van der Bosch, gerente di Caya Grandi Service Station, kende a duna detayes di e plannan cu propietarionan tin.
Diasabra mainta, despues di 11 aña cu a stop di uz’e, a cuminsa basha e edificio abao di loke tabata e station di gasoline na final di caya grandi.
E trabou a bay hopi rapido y pa dialuna niun hende lo mira cu tabatin un edificio eynan, segun el a splica. E idea ta pa construi of pone mas pomp. Aworaki nan tin 8 pomp.
E ampliacion ta algo cu tabata planea pa basta tempo caba, aunke e desaroyo di esaki lo no ta algo inmediatamente y por tuma luga den un periodo di un aña pa un aña y mey. Tur cos ta depende, el a bisa, di con e economia ta desaroya.
El a haci apelacion un biaha mas na automobilistanan pa tene cuenta cu tin hende ta traha riba e tereno y no core subi cu velocidad halto, solamente pa evita di uza e luznan di trafico.
