Un chauffeur di Arubus cu a bay corte contra su retiro inmediato no a haya rason. No ta ked’e nada otro cu busca un otro trabou. E ta un echo cu a tuma luga den luna di augustus y trata den corte na inicio di luna di november.
E persona aki, Elwin Chundro, ta den servicio di Arubus desde 2008 y tabatin un salario bruto di 5334 pa luna.
Tabata dia 21 di september ultimo cu e incidente a tuma luga ora cu e tabata na warda. Un mucha homber di diescuater aña a subi e bus rond di 3:36 pm, hunto cu su amigonan. Riba e camaranan por mira cu momento cu a bus ta move bay, tabatin un otro mucha homber ta core banda di e bus. A nota cu despues di un rato cu el a sigui su caminda, un di e mucha hombernan cu a caba di subi e primi e bal pa e bus para. Pero el a sigui core un rato mas. Na momento di bandona e bus, e mucha homber rabia a grita e chauffeur “hijo de puta”.
E demandante no a perde pa gana y a ranca e mucha homber wanta. Despues a push’e contra muraya y a bis’e algo. A want’e un rato na su camisa prome cu el a lag’e bay.
Na yegada el a informa e hefe na warda y e siguiente dia e Operations Manager a scucha su banda. Na final di e audiencia, gerencia a dicidi di mand’e cas, cu salario. Tur esaki pa Arubus por haci su investigacion.
Gerencia a inform’e despues cu den e investigacion haci a papia cu diferente persona. Y tur hende ta coincidi cu el a ataca e hoben pasahero tanto verbal como fisicamente, pero tambe a uza palabra malo contra dje.
A informe cu e menor a sinti dolor y el a comete e echo aki publicamente, y den presencia di otro pasahero / clientenan di Arubus, kendenan a sinti cu el a hinca hopi miedo den e menor cu e actuacion ey.
Banda di esaki, den su reaccion el a bula baha, lagando e bus cendi riba caminda publico cu tur e riesgonan pa e pasaheronan y e trafico na e sitio. Banda di esaki, un rato prome, rond di 15:02 el a laga e ruman morocho di e menor ataca, atras banda di YMCA. Esaki mientras cu a avis’e cu e mucha homber ta coriendo pa subi e bus.
Arubus a inform’e cu su actitud ta inaceptabel pa gerencia y intolerabel “manera a informa bo di esaki caba den pasado”. Tambe a informe cu su actitud ta bay en contra di reglanan di Ley di Transporte di Persona, y cual ta forma base pa neng’e su permiso di maneha den e sector aki, of kita esaki di dje.
Esaki tabata algun di e motibonan pa cual a dicidi di dun’e su retiro di inmediato.
Pa un relato amplio lesa TREMPAN.
