Desde cu a sali e noticia cu e director temporalmente di Departamento di Infrastructura y Planificacion (DIP) no ta na trabou, na Bestuurkantoor avalancha di hende ta yega eynan of ta yama. Nan ta pidi pa yuda cu nan peticion di tereno.
mr. Evelyn Wever-Croes, minister presidente, a indica cu hopi ta esunnan cu ta yega na Bestuurskantoor of yama pa pidi yudansa pa nan haya tereno of e peticion di tereno ta agelisa. E mandatario ta compronde con dificil e ta cu a haci peticion hopi aña pasa y no a atende cu ne. Tambe e ta compronde riba e frustracion cu ta bin di esaki, pero el a enfatisa cu na su ministerio nan no por haci e milagernan ey.
Nan tin un decision desde aña 2020, unda a traspasa autoridad pa loke ta trata di otorgamento na e director suplente, na un team di cuater persona cu ta encarga cu esaki. Wever-Croes ta pidi na tur esunnan cu ta en espera pa tin pasenshi p’asina duna nan e oportunidad di elimina tur atraso cu tin na DIP. Pa asina esunnan cu a haci un peticion haya un contesta. Esey ta e exigencia cu gobierno a pone.
Segun e minister, nan no por bay tuma decision ken si of no ta haya. “Nos no por tuma un decision ken tin cu haya prome cu otro. Tur esey ta contra regla, contra maneho”, el a indica. Pero loke si nan ta exigi ta cu mester elimina e atraso cu tin y esunnan cu a haci peticion sea pa tereno, cambio di uzo, pa prolongacion, etc., tin derecho di haya un contesta.
