Durante e ultimo dianan nos por a tuma nota di un calor extenso, temperatura hopi halto y un solo fuerte. Durante e dianan cu ta sigui comunidad por bay sigui experencia esaki cu por ta peligroso pa nos salud. Pa combati e fenomeno di naturalesa aki no ta posibel, pero si nos por tuma accion pa proteha nos mes y otro y tambe preveni consecuencia pa motibo di e calor extenso.
Nos por papia aki di un heatwave of cu otro palabra un ola di calor cu tin su efecto riba hende y bestia. Riba hende e tin efecto specialmente e personanan cu un enfermedad cronico manera, diabetes, presion halto, cancer, asthma, pero tambe esunnan cu nan trabou ta fisicamente pisa y pafo.
Otro grupo di riesgo ta hende grandi, baby, mucha chikito, hende cu sobrepeso y obesidad. Calor por causa deshidratacion, zonontsteking, presion halto, dolor di cabes, cansancio, biramento di cabes y stoma, sacamento, cram di musculo y asta ataca cerca un persona cu ta den e temperatura cayente pa un tempo largo.
Departamento di Salud Publico ta conseha comunidad pa durante e dianan cu ta sigui pa bebe hopi awa, por lo menos 2 liter pa dia, uza protector solar SPF 30 of mas, bisti bril di solo, pechi of sombre, paña di color cla preferibel di catuna of linen y evita bebida cayente y bebida cu ta contene cafeina of hopi sucu durante e oranan mas calor cu ta entre 11:00 am pa 2:00 pm.
Nos muchanan, enfermo y nos hende grandinan ta esunnan mas vulnerabel p’e calor aki. Ta hopi importante pa vigila nan constantemente y refresca nan curpa pa wanta e temperatura abou y hidrata nan cu suficiente likido pa evita un posibel heatstroke, cu ta un condicion hopi delicado caminda cu e curpa ta stop di soda. E temperatura di curpa ta sigui subi mas cu 40° grado Celsius y ta perhudica e centro di control cu ta regula e temperatura corporal den nos celebro.
Sintomanan di un heatstroke ta:
- Temperatura corporal halto den corto tempo
- Cara y cuero cora y seco
- No ta soda mas
- Curason ta bati duro
- Dolor di cabes
- Mente ta bira confuso y por cay flauw
- Por cuminsa saca of haya diaree
Kico pa haci den caso di un Heatstroke ?
- Busca asistencia medico mesora yama 911
- Tene e persona trankil y den fresco
- Los e pañanan na su curpa.
- Fria e curpa cu un serbete/paña muha (cu awa friu of di cranchi)
- Por pone ijs of icepack bou di brasa, na nek, lomba, riba stoma y/of memey di e pianan.
- Si persona ta consciente lag’a bebe awa no mucho friu.