Un situacion serio a surgi na momento cu a bati alarma na ImSan pa un canela, cu segun informacion inicial, lo a cuminsa den sala di operacion. Un evacuacion grandi a tuma luga y por a mira tanto pashent como trahado saliendo di e edificio.
Informacion di e situacion aki a cuminsa drenta den careda di 10:45 AM y mesora a mobilisa tur personal available pa dirigi nan mes pa ImSan. Brandweer a drenta den accion inmediatamente mientras polis a cuminsa prepara pa cera e area.
Un gran cantidad di personal di ImSan tabata na e momento ey parti pafo caba, den parkinglot y algun otro preparando pa transporta dos pashent cu maximo urgencia direccion Hopsital pabou. Entre nan tabatin pashent di Dialyse cu tambe mester a transporta nan pa hospital pa continua cu nan tratamento.
E dos pashentnan cu a transporta, tabata na e momento ey den sala di operacion na ImSan ora cu candela a inicia. Den colaboracion cu Dr. Horacio E. Oduber Hospital, a paralisa sala di operacion di nan pa asina tuma over e pashentanan aki cu a nan transporta cu urgencia pa continua nan operacion eynan.
For di San Nicolas a sali dos ambulance mientras polis di tur districto a cera e ruta pa asina duna espacio pa ambulance por yega mas lihe posibel. Te na e momento aki no tin informacion si tin persona a resulta herida ni tampoco unda precies e candela a inicia y con esaki a cuminsa.
Un rato despues tambe a presenta truck di Mariniers Kazerna como cu a activa nan tambe pa asina bin duna un man cu e calamidad aki. A purba busca e prome declaracion di e director di ImSan pero na e momento ey el a opta pa no duna un declaracion.
