Aruba ta un isla cual su economia ta draai primordialmente riba turismo. E mercado di Merca ta keda esun mas grandi, pero esun di Latinoamerica, principalmente Colombia tambe ta uno hopi atractivo.
Pero hopi ta e kehonan cu e ciudadanonan Colombiano ta haya for di e autoridadnan na inmigracion na nan entrada. Ultimo biaha tabata un cantante Colombiano cu inmigracion no a laga drenta Aruba y a deport’e pa su pais. Esaki tambe tabata e caso di un ciudadano, Eric Vinck cu a denuncia cu inmigracion Arubiano no a laga e colega di su yiu homber, cu ta studiando medicina na Colombia, drenta nos isla.
Su yiu homber a invita su colega cu ta traha den ramo di enfermeria pa bin conoce nos isla. E colega, cu ta traha cu hopi Rubiano na Medellin, a bin Aruba cu vakantie pa siña conoce e bunitesa di nos isla. Na su yegada, a nenga di lag’e drenta. Motibo cu nan a duna tabata cu e colega no tabata por a demostra cu e tin suficiente placa pa su estadia. El a yama inmigracion, pero e persona cu a atend’e no a identifica su mes. Segun Vinck, e colega di su yiu homber, ta un persona decente y un profesional. Si e tabata tin e placa mes cu ne, e no tabata tin mester di gast’e, pa motibo cu el a bin pa keda na su cas y no na un hotel. Ta nenga di laga un profesional drenta, mientras cu e criminalnan mes ta drenta manera nad’un pasa. Si el a acepta cu e no a traha un carta di invitacion pa e colega di su yiu homber.
E motibo primordial pa cual no a lag’e drenta, ta pasobra cu e no tabata tin cen suficiente, cual ta 150 dollar pa dia, pa su estadia na Aruba. Pero si tur su documentacion tabata na ordo. Si a spera cu lo a dun’e un trato mas humano. Pero e manera autoritario cu cual e personal di migracion di Aruba ta trata nos turistanan ta inhumano y no tin nada di haber cu regla.
Por ultimo, Vinck a bisa cu ta parce cu esunnan cu ta traha na inmigracion no ta capacita pa ta den e funcion ey. Ora cu ta pone hende incapacita den un funcion, esey ta problema so e ta trece. E manera cu ta trata e turistanan, ta trece mal imagen pa nos pais.
Apenas Aruba ta recuperando di e sla cu e pandemia a trece den nos mercado turistico y esaki sigur no ta yuda tampoco.
“Mester corda cu ora cu nos bay Colombia, nos si kier pa nan trata nos di un manera cordial y husto. Ta e hendenan aki cu e autoridadnan na inmigracion ta deporta, manera criminal, ta esunnan cu lo mester ricibi nos na nan pais,” Vinck a bisa. .
El a haci un apelacion na tur e autoridadnan concerni, pa uza e autoridad cu nan tin, na beneficio di e ser humano.
