Parce cu alafin minister Arends a baha for di su cabay di arogancia y a baha su tono. Esey ta un bon señal pa asina sinta na mesa y pone un punto final na e polemica encuanto cuido di nos grandinan na SABA. Minister tabata papia di falta di cuenta anual di SABA, mientras SABA tin su relato financiero anual traha. Minister parce di no ta na altura tampoco di cuanto costo di bida a subi den e ultimo dos añanan entre otro aumento di prijs di Elmar y WEB.
E minister no ta corda cu su partido Raiz recientemente a vota pa exonera un ex-minister di MEP pa malgastamento di placa di pueblo na balor di 2.1 miyon florin. Si a hinca e placa den eigenbijdrage pa remedi di AZV y SABA sikiera lo a mira cu e placa lo a wordo bon inverti den grandinan pa un miho calidad di bida y no pa scapa un ex minister cu a hinca pais Aruba den debe sabiendo cu e no ta rendabel. Minister mester puntra su mes si esaki ta integridad?
Ainda falta e BBO di 7% na frontera. Un otro medida pa gobierno saca 40 miyon florin. Con gobierno a yega na e cifra aki ainda ta desconoci. Supuestamente di e mercado informal? E berdad lo sali na cla. No ta un secreto publico cu te dia di awe gobierno no a baha gasto y fiesta ta sigui. P’esey placa no ta yega. Gobierno ta sigui ranca placa for di cartera di pueblo pa asina sigui biaha. Tur e miyones na biahamento no a trece ningun resultado pa nos isla. Gobierno mester corda riba e vakantie-uitkering cu gobierno a paga mita na aña 2020 mientras cu e ambtenaarnan a paga henter un aña si a cumpli cu nan parti. Gobierno ta gaba cu turismo ta miho cu prome cu pandemia pero e maneho di entrada di gobierno a keda mescos, esta ta tira placa den un bari sin bom. Riba dje gobierno ta saca bono pa e suma di 165 miyon florin na un interes di 6.25% cu un termino di nuebe aña esta na 2032. Asina gobierno ta sigui crea debe pa pais Aruba.
Gobierno ta yen di empleadonan publico pero tin departamento di gobierno unda tin scarsedad di trahado. Entre nan falta di polis despues cu pa di 6 biaha den ultimo dies aña no tin opleiding pa polis y dentro di poco mas cu binti polis lo baha cu pensioen. Ya tin un scarsedad di 200 polis. Riba dje gobierno ta corta overtime. Segun nos por a compronde cu KIA falta personal, brandweer falta di personal y otro departamento. Gobierno ta pone siguridad di nos pueblo na peliger.
Parlamento tin dos ley pa trata prome cu bay cu vakantie na juli. Esta e ley di BBO di 7% na frontera y e ley di matrimonio di mesun sexo. Nos por a mira cu na Merca negoshinan grandi manera Kohl’s ta hiba un perdida grandi pa via di promove articulo gender pa muchanan. E luga aki a hay’e ta saca e articulonan aki paso su benta a cay te na suela. Asina tambe Target a hiba un perdida di dies biyon di dollar den dies dia y budlight tambe a perde su benta di cerbes na balor di diescinco biyon di dollar y e pueblo mericano no ta tum’e ni regala. Nos corda Disney World, Amazon y Netflix a hiba un perdida grandi pa mesun motibo. Esaki mester bira un señal pa nos gobierno cu e pueblo Americano ta keda un pueblo conservador y cu no lo biaha pa un isla liberal. Un Target, Kohl’s y budlight nan entrada financiero ta mas halto cu di pais Aruba y nos ta depende di e turismo di e mercado Americano.
Aruba su economia ta fragil y nos tin un gobierno di desastre. Nos tin parlamentarionan cu ta bisa di ta Cristian pero te dia di awe nan no a demostra di ta para pa Dios sino nan ta forma parti di un partido cu for di 2016 a bay contra e leynan di Dios y asina mes nan ta sigui sostene nan partido cu no ta respeta e matrimonio crea pa Dios y mucho menos ta sali na defensa di nos criaturanan indefenso. Tur partido den nos Parlamento a bay contra leynan di Dios. Pronto e husticia di Dios lo baha pa via di sostene e leynan contra Dios su principio. P’esey mes den e proximo eleccion pa e pueblo Cristian haya reconocimento den nos Parlamento e unico alternativa ta partido Curpa cu for di un principio a alerta nos pueblo riba e partidonan politico cu no ta honra Dios y cu ta bay contra Dios su leynan. E pueblo Cristian ta mayoria y por duna partido Curpa e mandato pa sali na defensa di nos pueblo.
