Recientemente por a tende expresion di lider di partido AVP di ta bay bolter cos. Ora Hesus a drenta e tempel a bolter mesa paso nan a haci cas di su Tata cueba di ladron. Ta obvio cu no tin comparacion cu Hesus paso como yiu di Dios e tin e autoridad pa actua riba indicacion di nos bon Dios.
Lider di AVP no tin pues e autoridad pa bolter cos, pero loke si por compara ta con Cocolishi a para bira un cueba di ladron moderno. Partido CURPA ta convenci cu e wowo di pueblo a habri y cu den e proximo eleccion un cambio grandi lo tuma luga. Si nos mira e resultado di eleccion di 2021 nos por saca afo cu 19.550 persona no a vota ni pa partido AVP ni partido MEP. Partido MEP mescos cu partido AVP lo bay sinti e furia di nos pueblo cu durante 7 aña a wordo suta cu yen di medida. Partido MEP a core un campaña cu lo goberna sin medida paso nan a studia y conoce e materia pero a resulta otro. Pueblo a haya un decepcion grandi den e partido aki.
Hopi importante pa conoce bo historia paso esunnan cu no conoce historia di nan pais ta core e riesgo cu e historia ta ripiti. Awe nos por bay bek den tempo caminda partido MEP tabata na poder ora a kita vakantie-uitkering y 7.75 % for di e salario di empleadonan publico y e famoso 8.2% cu henter pueblo mester a paga. Mas cu 10 aña di sacrificio di empleadonan publico y henter nos pueblo. Awe nos historia ta ripiti y pueblo ta sufri e consecuencia pa vota pa partidonan politico cu ta gaña pueblo durante di campaña y ora nan yega na poder ta lubida kico nan a priminti pueblo. Nan propio interes ta bin na prome luga y interes di pueblo ta na ultimo luga. Esaki nan ta palabranan cu tin cu keda ripiti pa asina pueblo keda corda y ora di haya e oportunidad pa vota no lo vota mas pa politiconan cu tin nan propio interes na pecho.
P’esey tambe partido CURPA ta urgi e pueblo cristian pa no bolbe cay den e trampa di promesanan falso paso a keda demostra cu e interes di e pueblo cristian no ta importante pa esunnan cu ta papia di Dios paso nan curason ta leu for di Dios. E gobierno cu a firma e agenda 2030 di e Desaroyo Sostenibel no tin Dios den nan curason paso e agenda aki ta bay rectamente contra e bienestar di e pueblo cristian. Un agenda cu ta trece division den pueblo cu su meta ta pa destrui e famia cu Dios a institui na e mundo aki. Mas pio ainda kier confundi nos criaturanan y destrui bida di nos futuro generacion. Ki speransa nos pueblo lo por tin si e agenda ta contra di boluntad di Dios? Aruba no por tin gobernantenan cu ta tene man cu scuridad y kere cu lo por disfruta di e bendicionnan di Dios. Merca ta prepara pa tres dia di black out y kisas mas dia ainda y ta pidi pa e pueblo Americano pa tin 21 dia di cuminda pa locual cu ta na caminda.
E lunanan di maart, april y mei ta lunanan crucial nos dilanti. Locual afecta paisnan grandi lo tin consecuencia pa nos tambe. E tres dianan di black out si bo no tin cash lo bo ta den problema paso lo bo no por swipe tampoco. E plan di agenda 2030 ta pa forsa un collapse economico mundial cu introduccion di e moneda digital. Hopi hende lo grita ora nan lo no por saca nan placa na banco y perde locual cu nan a spaar cu hopi sacrificio.
E partidonan politico cu a firma pa e agenda 2030 di Sustainable Development Goals ta bon na altura di e contenido. Mas tristo ainda ta cu nos tin parlamentarionan supuestamente cristian cu ta sigui sostene e agenda di satanas aki. Nan kier bay shelo pero no kier muri. No tin tempo pa perde mas of bo ta cu Dios of bo ta cu e enemigo. Scoge awor y no mañan. Mañan ta laat y no ta den bo man. Esaki ta haci cu partido CURPA ta e unico alternativa.
