Partido Arubaanse Volkspartij (AVP) a encabesa e encuesta cu 24ora.com a realisa dia 24 di maart ultimo, pa ser exacto, net 6 luna leu for di eleccion. E di dos partido cu a goza di votonan bou di nos usuarionan ta partido Movimiento Electoral di Pueblo, MEP. Locual toch a sorprende hopi tabata cu net despues di MEP, ta bin e grupo grandi di ciudadanonan cu no lo vota den e siguiente eleccion of cu no a dicidi ainda pa kende nan lo vota.
Nos a priminti di lo organisa un encuesta asina tur dia 24 di luna, pa midi con cada partido ta para pa eleccion cu lo a tuma luga dia 24 di september. Cu e cambio abrupto e siman aki, awor eleccion ta tuma luga 25 di juni y mester reevalua si ta sigui haci un solo encuesta pa luna of haci mas pa por midi con cada partido ta posiciona den comunidad.
Un total di 5.392 persona a participa den e encuesta aki riba 24ora.com. Di e participantenan, 1942 a vota pa AVP, 1109 a vota pa MEP, 975 no sa ainda pa ken nan lo vota of lo no vota mes, 602 lo vota pa Raiz, 170 pa RED, 152 pa HTC, 109 pa Pueblo Prome, 92 pa CURPA, 84 pa POR, 76 pa Accion 21, 43 pa UPP y 36 pa PPA.
Segun e encuesta aki, haci 3 luna prome cu eleccion, ta duna bo un indicacion cu AVP ta comodo na prome luga, cu si acaso tabatin eleccion siman pasa, cu nan lo a gana. Esey no ta sorprende pasobra den e ultimo eleccion tambe nan tabata e partido mas grandi cu 23.376 voto mientras cu MEP a haya 22061 voto. Si mira e resultado aki, ta evidente cu e “gap” entre AVP y MEP toch ta relativamente grandi na e momento aki.
Ta bon pa menciona cu e encuesta aki ta haci prome cu caida di gobierno, pues no sa cu awor cu Minister Presidente a entrega retiro di su gabinete, si e percepcion a keda mesun cos of lo a cambia. Den e siguiente encuesta lo por nota esaki, esta cu si e votadonan di MEP lo acepta e caida di gobierno of no. Mesun cos ta conta pa partido POR, cu awor ta bou di investigacion di husticia pa posibel malversacion cu fondonan di Parlamento.
Cu e dos partidonan AVP y MEP lo resulta mas grandi no ta sorpresa pa ningun hende. Pero tin algun punto cu si ta sorprendente, por ehempel, e cantidad halto di hende cu no tin interes pa vota of cu no sa ainda pa ken nan lo vota den e siguiente eleccion. Claro cu esaki ta e grupo cu awor partidonan lo mester acerca y purba convence pa vota pa nan. Por considera esaki e swingvoters cu por cambia pa cualkier partido ainda, depende na con ta campaña, kico ta e vision of plannan pa futuro.
Partido Raiz, den e encuesta aki a keda na di tres luga, sigui pa partido RED cu ta hopi mas abou den voto cu Raiz. Esaki kisas ta un mensahe cla na e partido color blanco, cu a profila hopi na 2017 den asunto di cannabis, cu te ainda no ta regla. Despues di RED ta sigui partido HTC cu a score mas halto di locual hopi lo a spera. Ta duna bo un idea cu nan tin acogida den comunidad, probablemente cerca e hobennan.
E demas partidonan a score bastante abou, dunando nan un indicacion cu tin mas trabou pa haci pa por yega na votadonan. Sea e mensahe no ta yegando suficiente ainda of cu comunidad no ta mira nan mes asocia cu e partido politico encuestion.
