Ainda ta fresco den memoria di hopi, con e hoben Nigel Maduro a subi e monumento di e driekiel na rotonde riba Avenida Nelson Orlando Oduber. E hoben su mensahe tabata simpel: No mas hotel!
Dialuna mainta, durante cu tabata tin e ceremonia protocolar riba Plaza Libertador Betico Croes, en conexion cu celebracion di Dia di Himno y Bandera un grupo di activista di medio ambiente a interumpo e speech di protesta di Prome Minister mr. Evelyn Wever-Croes.
E grupo di activista di medioambiente tabata encabesa pa Nigel Maduro. Di e manera aki nan a expresa nan preocupacion tocante e futuro di nos isla, su naturalesa, nos economia y e nos herencia cultural.
Locual cu e grupo kier trece dilanti ta cu nan lo kier wak gobierno y e lidernan den parlamento pa duna naturalesa un prioridad, paso Aruba ta den un crisis di medioambiente y lo mester accion, urgencia, y cambio di sistema pa ta mas sostenibel. E grupo tambe kier a trece dilanti cu si nos sigui asina y no cambia sistema, eventualmente sistema ecologico, social y economico lo cay den otro.
E grupo a dicidi di haci e protesta aki dia di 18 di Maart, paso nan tawata kier a recorda tur hende cu e dia historico y nacional di 18 di Maart su reis a cuminsa como un protesta pa nos lucha pa nos independencia.
Recientemente, tawata tin un movemento den pueblo cu a cuminsa cu e lema “No More Hotels” y “Land Back”, despues di e graffiti cu a wordo pinta na diferente area nan turistico na Aruba. E movemento a haya atencion riba social media y tambe den exterior. A mustra cu pueblo tampoco no ta mucho contento cu e cantidad di hotel nobo cu ta den construccion na Aruba. Tambe pueblo a cuminsa ripara cu ta bende hopi terenonan grandi cu historia arkeologico di nos antepasado nan Indigena na prijs halto y mayoria biaha ta duna nan na e inversionistanan rico di afo. E terenonan bendi tambe ta resulta den rosamento di mondi y e habitatnan di bestia nativo y endemico di Aruba ta bay perdi.
Otro problema medioambiental cu ta pasando ta e RWZI cu ta sobrecapacita door di e volumen di desperdicio cu ta bin for di e industria di hotel y turismo. Varios biaha, local y turista nan a tuma nota cu tin un holo fuerte di awa di pos na diferente luga nan manera Palm Beach, Eagle Beach y mas y tambe a tuma nota cu e awa di desperdicio ta drentando directamente den nos lama nan anto cu tin riesgo ariba nos salud y tambe nos naturalesa.
Siman pasa tambe tawata tin un oil spill for di e exploracion di Trinidad y Tobago cu a yega na e costa nort di Aruba, anto esey mes ta un señal na nos gobierno pa para e contract firma di LNG (exploracion di gas na Aruba, paso e industria ey tambe tin riesgo grandi y malo pa nos medioambiente.
Siguientemente, Aruba ta sintiendo e efecto nan di cambio di clima, paso cada aña, Departamento Meteorologico di Aruba ta bisando cu Aruba ta birando mas calor cu record den temperatura y cu temporada seco ta birando mas largo.
Importante pa bisa cu hasta turista cu ta bishita Aruba pa añanan largo mes ta bisando cu Aruba ta cambiando hopi mes cu e situacion di e cantidad di hotelnan cu lo bay bin. Par di turista mes ta expresa cu nan no lo bin Aruba mas paso e bunitesa di Aruba su naturalesa ta disparciendo y cu tin hopi otro destinacion cu si lo tin mas luga cu ta balora nan naturalesa. Esaki ta mustra nos cu hasta e crisis di medioambiente ta costando nos placa y ta bay tin impacto negativo ariba nos economia.
Na fin di dia, hopi ciudadano ta preocupa pa e situacion di proteccion di naturalesa y e riesgo nan di cambio di clima cu lo bay pasa na Aruba. Hopi hende ta expresa cu nan no ta contento cu e direccion cu nos ta bayendo cu nos sistema, anto lo kier wak cambio di sistema y cambio duradero pa nos futuro. E grupo activista di medioambiente kier a trece e mensahe di pueblo y di nos naturalesa dilanti, anto mustra gobernante nan y miembro di parlamento cu nan mester refleha y representa loke pueblo ta bisa, paso asina nos sistema di democracia ta traha. E protesta ta pa exigi pa mas accion pa cambio di clima, prioridad y proteccion di nos naturalesa , preservacion di nos herencia cultural di nos antepasado Indigena y pa tin cambio di sistema cu lo refleha locual pueblo kier.
