Autoridad a mobilisa rapidamente awe mainta pa un situacion di peliger, ora cu a bati alarma pa un auto na candela den cercania di e stacion di gasolin na Ponton.
Esaki a tuma luga den careda di 10:30 na band’i panort di Ponton Service Station. Un chauffeur femenino a staciona su auto pa asina e por a bay den e tienda pa cumpra algo.
Un di e empleadonan cu tabata brindando servicio di gasolin na cliente, a tuma nota cu huma tabata sali di e auto. A bati alarma di candela mesora.
Accion heroico. E empleado a notifica e doño di e auto (Audi A-3830) y asina a core drenta den auto y hala esaki un poco mas patras, pa e por ta poco mas leu di e pomp.
Un bisiña balente a bringa y paga e candela te ora cuerpo di bombero a yega na sitio y asina domina e candela por completo. E chauffeur, cu lagrima na wowo, tabata observa con su Audi a keda pero conforme cu e no a resulta herida y cu no a surgi un desgracia grandi y/of fatal.
