Ernst Noorman ta Embahador di Reino Hulandes na Colombia. Recientemente a tuma luga un evento special na e tayer di Gilbert Senchi na e parti Sur di Bogota. Entre e invitadonan special, tabata invita; Ernst Noorman. Noorman ta contento cu e proyecto di Gilbert Senchi, e ta gradici Minister Maduro pa su presencia y pa duna balor na arte publico en general. Noorman a enfatisa riba e importancia di proteha driekiel na Aruba. Manera a indica anteriormente, na januari proximo lo revela e arte publico driekiel durante e Bishita Real riba nos isla.
Gilbert Senchi t’e artista encarga cu e proyecto di e driekiel como tambe e busto na memoria di Tino Ruiz. Senchi a conta cu su soño ta pa algun dia e por train mas hende, specialmente e hobennan di arte publico y cu por hacie na Aruba mes. E idea di e evento na su tayer na Bogota tabata mustra e invitadonan con e proceso ta bay. Por ehempel esun di Tino Ruiz, ta cuminsa prome cu e parti di studia e defunto mas di cerca, pues potret di archivo pa ta sigur cu e busto lo ta casi mesun cos cu ne. Locual cu ta importante den e proceso ey ta famia, e mayornan di Tino tabata completamente activo den e proceso. Despues ta sigui cu e proceso pa duna forma na e busto sigui pa tres parti importante kende ta pleister, wax y sand. Ta smelt e brons den un tipo di forno bieu. Despues di asambl’e ta sigui cu e ultimo detayenan na su pechi, uniform, cara y mas. Senchi lo ta encarga tambe cu e proceso di mantencion despues cu revela tanto e busto di Tino como tambe e driekiel.
Pa den futuro por spera mas proyecto entre Gobierno di Aruba y Gilbert Senchi. Senchi ta contento cu e participacion activo di Minister Xiomara Maduro den henter e proceso. Ambos arte ta practicamente cla, durante e evento, algun compania di carga tabata presente pa tuma tur midi y cuminsa cu preparacion pa transporta e artenan pa Aruba. Pronto lo spera riba e parti pa revela ambos arte cu Gilbert Senchi a traha. E artenan aki no por tabata posibel sin cooperacion di Minister Rocco Tjon y su conseheronan, Minister Xiomara Maduro cu ta encarga pa e parti financiero y su conseheronan, Minister President y su conseheronan, DOW, mama y tata di Tino Ruiz, Dolfi Richardson di InterPol, ARTopia y algun personahe mas di interes.
