Na Punta Cana, Republica Dominicana, a tuma luga e competencia di Mini Model World 2023. Elise Heronimo ta e Mini Model World Aruba y representa Aruba, ganando dos titulo.
E competencia a tuma luga desde 20 pa 26 di juni, unda 30 mucha a participa den diferente categoria. Panama a gana e titulo di Mini Model World 2023, mientras cu Elise Heronimo a gana e titulonan di Top Mini Model World 2023 y Top Model Social Media 2023.
Elise Heronimo tin nuebe aña y ta den mundo di modelahe. Elise tin apenas nuebe luna ta modelando y ta mini model di Cas Princesa Aruba. Mama di Elise, Marisol Heronimo, a expresa cu esaki ta Elise su prome salida internacional, pero no ta prome bes cu e ta riba stage.
E mama ta recorda cu nuebe luna pasa Elise tabata cu su cel. El a mira e anuncio cu Cas Princesa a pone di ta en buskeda di candidato. Como mayor y e sa con su yiu ta, el a warda pa Elise puntr’e tres biaha. Asina ey el a bisa si y awo e ta forma parti di e mundo di modelahe.
Preparacion
Preparacion pa e competencia aki a exigi hopi tanto di Elise como e famia. Elise a biaha cu un total di nuebe paña pa diferente actividad. Mama di Elise, Marisol Heronimo, a informa nos redaccion cu nan a purba di haci mas leuk posibel p’e. E preparacion tabata uno intensivo, e no tabata facil.
E tabata exigi hopi disciplina di tanto Elise como e famia mes. E mama a expresa cu sin e organisacion aki hamas su yiu lo a yega asina leu. “Nan ta echt amazing. Nan ta hopi bon organisacion. Como mucha di nuebe aña e biahamento por bira intenso.” E grupo cu a prepara Elise p’e competencia aki ta juffrouw Jessica Anthonij.
Trahe y makiyahe
Pa nan e dianan tabata hopi largo y nan mester a bay hopi biaha na costurera p’e pañanan. Pa loke ta trata e pañanan, Marisol mes a diseña mayoria di nan. E trahe di espacio tabata den man di Micheal Douglas. Su costurera tabata Jaide Boekhoudt. Un di su trahenan tabata un inspiracion di e mural na San Nicolas. El a bay cu un total di nuebe paña pa diferente actividad.
E tabata seis dia di hopi trabou y rush door di cambia paña, cabey, sin lubida e makiyahe. Hunto cu nan a biaha e stilista. “Allan Kock tabata encarga cu e makiyahe. El a haci un trabou fabuloso cu Elise. El a keda bunita. Allan a percura pa haci un makiyahe cu ta pas p’un mucha di nuebe aña”, el a expresa.
