Desde ayera tardi, drs. Ramon Arnhem, ta e altocomisario nobo di Cuerpo Policial Aruba. El a hura dilanti Minister di Husticia y Asuntonan Social, den presencia di Minister Presidente y Procurador General di husticia. Ta pa prome bes den su bida cu e ta alcansa e posicion maximo den un cuerpo di polis.
Ramon Arnhem ta bira e di ocho hefe di polis di Aruba, siguiendo Roland Peterson qepd, Lucas Rasmijn, Alwin Nectar, Ronny Bernadina, Dolfi Richardson, Andrew Hoo y Vanessa Tjon-Kock.
Un comision a scoge Ramon Arnhem
Henter e procedura pa un Korps Chef nobo tabata masha transparente y tur hende por a solicita, segun Minister di Husticia a menciona algun luna pasa. El a menciona cu no ta el a sinta cu e candidatonan, sino un comision special. E comision di escogencia a consisti di Procurador General, director di Departamento di Recurso Humano di gobierno (DRH), altocomisario suplente y director di Veiligheids Dienst Aruba (VDA). Nan a haci un nombramento y segun e mandatario, e ta completamente transparente. Na final e comision aki a scoge e candidato cu a solicita for di Hulanda.
Pa un relato mas amplio, lese den bo corant digital TREMPAN.
