Ta for di awe marduga a start un investigacion y buskeda pa doño di e auto A-57912, cu ta biba na Tanki Leendert. Pero mientras tabata busc’e, awe mainta su ruman homber a entrega su mes na ward’i polis di Noord. Ta trata aki di e hoben Lysander Hernandez, naci na Aruba di 20 aña di edad. Ta sospech’e di lo a causa un accidente cu consecuencia fatal y despues bandona e sitio sin laga ningun informacion di dje atras. Pa ser exacto, Ministerio publico ta papia di ‘homicidio imboluntario’.
Prome morto den trafico
Awe diaranson pa mas o menos 1:30 am a sosode un accidente entre dos auto riba Watty Vos Boulevard, entre rotonde di Cumana y (paperclip) Sero Patrishi. Ta investigando con un auto marca Toyota modelo Vitz color shinishi, numera A-57912 a dal tras di un pickup marca Toyota modelo Hilux, color cora, numera A-2462. E impacto tabata asina fuerte cu e Vitz a dal tras di e Hilux, pon’e perde control y bah’e fo’i caminda, cu consecuencia cu e pickup a bay cay den un rooi. Pa 2:20 am, Dr. Texier a constata morto di chauffeur di e pickup, Robert A. Calmes, naci na Aruba di 57 aña di edad. Su casa, Maroushka Calmes-Loefstop tabata den auto cu ne y cu ambulance a transport’e pa hospital pa ricibi tratamento medico. El a keda interna pa mas observacion y cuido adicional. Esaki ta prome morto den trafico pa aña 2022.
Robert Calmes masha stima
E victima Robert Calmes ta trahando pa basta aña caba den Cuerpo Especial Arubano y ultimo añanan e ta trahando na Ministerio Publico. Como mucha e tabata den welp y despues padvinderij, den unda el a haya e disciplina cu semper el a aplica den bida. Separa di su trabou, su hobby sin duda ta cushina. E ta un coki tur afo y hunto cu su mama tabata traha na El Porton. Su ruman homber ta traha hopi aña tambe den Cuerpo di Bombero y hopi biaha nan sa ta hunto, como un famia masha uni. Su yiu ta traha na Guarda nos Costa. Su casa Maroushka mes tambe ta traha na Ministerio Publico.
Testigo a conta
Segun testigo na e sitio, e Toyota Vitz tabata biniendo cu velocidad halto. Den e impacto, e pickup a bay den su banda y despues cay bek riba su cuater tairanan. Ta sospecha cu durante e impacto aki, e chauffeur a haya hopi sla na cabes, cu consecuencia fatal. Tambe a nota con chauffeur di e auto cu a ocasiona e accidente a baha y move mesora di e sitio, sin cu a bay purba yuda e victimanan cu a keda pega atras den e pickup.