Nos a drenta un di e temporadanan di mas spera, gusta y importante di e cultura Arubano. Un temporada cu semper nos comunidad a celebra den gran forma cu hopi musica, alegria y goso.
Sinembargo e ultimo dos añanan aki a bira e pio añanan den historia recien pa mundo henter. Ta aña cu hopi reto, situacion sin precedente y di incertidumbre pa hopi ser humano.
A pesar di tanto reto, e ser humano a keda cu e necesidad profundo di ta inspira y motiva pa sinti positivismo y speransa cu e situacion actual lo mehora.
E rol di e artista tabata hopi importante durante e crisis mundial aki, specialmente esunnan cu ta crea y presenta musica. E efecto di esaki ta uno relahante y inspirativo pa hopi hende.
Considerando e importancia pa sigui motiva, inspira y eleva nos hendenan, Edjean Semeleer a dicidi un biaha mas di presenta un proyecto musical p’e temporada di fin di aña 2021 cu tanto nos comunidad ta anhela pa celebra di un forma of otro.
Durante henter 2021, nos por a mira varios concierto presenta pa Edjean y su orkesta. Ta varios concierto cu a disfruta via di e canalnan local di television como tambe na Corsou, Boneiro y tambe riba varios plataforma social.
E proyecto musical aki cu a haya e nomber “Bonanza” cu ta consisti di dos concierto sumamente special pa engrandece e celebracion di Pasco y tambe di Aña Nobo lo ta presenta for di e calor di Edjean su propio hogar, percurando pa e transmision aki por yega den tur skina riba nos isla y tambe pa tur esunnan rond di mundo cu kier sinti e calor di fin di aña cu nos ta conoci pa transmiti.
Un elenco excepcional di artista y musico tambe lo forma parti di esaki simplemente pa alegra e alma y curason di tur nos hendenan.
E gran estreno di e concierto di Pasco lo ta diabierna 24 di december pa 9:00 pm y e concierto di Aña Nobo lo ta diasabra 1 di januari 2022 riba e mesun ora. Hunto nos lo yama 2022 bonbini y desea pa e trece hopi bonanza pa nos tur.
Pa un cobertura mas amplio lesa e edicion di TREMPAN di mañan.
