Awe tabata un dia masha dificil pa nos redaccion. Pa diferente motibo. Nos amigo Ski, un persona cu nos tur conoce di hopi cerca y pa hopi aña, a fayece. Personanan cu kizas no ta na altura di tur e hechonan y tambe gruponan politicamente motiva y contra nos medio, a purba haci uzo di e momento aki pa ataca 24ora.com pa motibo di e reportahe haci. Laga nos pone e echonan awe den perspectiva pa por compronde cu locual a pasa awe mainta tabata algo completamente inespera:
- Desde trempan awe comerciantenan cu tienda dilanti Royal Plaza a yama pa pidi ayudo. A laga Ski benta abou na suela sin ayudo y cu dolor
- Nos a bay eynan y a entrevista e comerciantenan aki cu a lamenta e forma di trata cu e homber. A pidi pa ayudo.
- Ski tabata sclama di dolor, pa cual nos reportahe tabata pa pone presion pa autoridadnan haci algo.
- Ey nos a comprende cu Ambulance a bay Mainta caba cerca dje, pero el a nenga ayudo medico. El a hasta firma cu e no kier ayudo.
- Durante cu nos a yega na e sitio nos mes a yama Polis, cu a regresa cerca dje
- Nos intencion tabata pa yude toch, pasobra tabata bisto cu e tabatin dolor
- A puntra dicon nos no a yud’e eybou. Nos no por mishi cu un pashent si nos no tin conocemento medico y esaki ta hasta prohibi pa ley. Por a hasta mira cu e Polis no por a mishi cu ne ora el a yega.
- Lamentablemente, wardando autoridad, e la fayece. Esey ta algo cu nos no por a premira ni a spera cu lo a pasa durante cu nos tabata live.
- Nos meta tabata pa haya yudansa pa un persona special. Nos a logra, pero tabata mucho laat.
- Na ningun momento nos intencion tabata of ta pa haci nada malo of laga Ski mustra malo. Nos kier a yud’e.
Mirando e reaccionnan, nos a opta si pa baha e video for di online. Ski tabata un persona yega na nos oficina y ta bishita nos regularmente, te siman pasa ainda. Na su famia, nos mas sincero pesame y cu Ski sosega na paz.
Foto: Michael Fowler
