Bon bini na e editorial mensual cu Dasha! Ami ta Dasha Dubero, y mi ta un boticario na Botica di Servicio.
Mientras nos ta drenta den temporada di horcan, bo salud y bienestar lo ta un prioridad. Fuera di sigura bo cas, ta importante pa prepara pa posibel desafionan relaciona cu bo salud. Mi persona lo duna algun conseho esencial pa yuda bo mes y bo famia keda saludabel y safe durante e temporada di horcan:
Preparacion di remedi
• Sigura bo tin suficiente remedi cronico pa dura te na final di e temporada. Corda pidi mas y busca nan na tempo pa evita problema na ultimo momento. Tene na cuenta si cu e maximo cu por busca na Botica ta pa un duracion di 3 luna.
• No lubida di inclui e remedinan sin receta (Over-the-Counter): manera remedi pa dolor, anti-acidonan y remedi pa alergia den bo kit di emergencia.
• Informacion Medico den Casonan di Emergencia: Mantene un saco cu ta resistente contra awa cu informacion medico, lista di remedi, alergia y contacto di emergencia.
• Tene na cuenta con bo remedi mester ta warda, por ehempel, na ki temperatura e mester ta den caso cu coriente bay, con largo remedi lo wanta pafo di frishider, etc. Pa mas informacion bishita bo boticario pa conseho personal tocante bo remedi.
• E ta importante pa tene un lista actualisa cu bo remedi. Esaki ta crucial pa tin den tur momento, pero mas importante den casonan di emergencia durante temporada di horcan.
Loke ta esencial den First-Aid Kit
• Pleister y Verband: Tene pleister, gasa steriel y tape pa gasa pa herida.
• Anti-bacteria: Inclui wipes of likido pa limpiesa di herida y prevencion di infeccion.
• Thermometer: Controla bo temperatura cu un thermometer digital, specialmente durante un situacion di emergencia.
• Remedi pa dolor: Tin remedinan pa dolor cu por cumpra sin receta manera paracetamol.
• Remedi pa Alergia: Trata alergia relaciona cu tormenta cu antihistamina manera cetirizine.
• Herment: Warda tweezer y sker pa saca splinter y corta verband
• Manual di First-Aid: Inclui un guia pa proceduranan esencial den first-aid
Preveni Enfermedad
• Higiena di Man: Laba bo man frecuentemente cu habon y awa limpi. Uza hand sanitizer (60% alcohol) ora awa ta scars.
• Awa: Sigura cu e awa ta limpi/sin bacteria safe door di herb’e of uzando tabletnan di purifica si ta necesario.
• Cuminda: Come tur loke no por warda largo prome y mantene frishider/freezer cera durante momento cu no tin coriente.
• Evita Awa Para: Evita awa para pa preveni cualkier infeccion.
• Mantene bo mes informa: Sigui guia di autoridad local riba evacuacion y medida di siguridad.
• Bo salud ta valioso: Semper sea prepara ta e clave di proteccion. Como bo botica di confiansa, nos ta akinan pa sostene bo salud y siguridad durante e temporada di horcan. Tuma contacto cu nos si bo persona mester di cualkier asistencia cu remedi of ekipo pa bo salud.
Tene cuidou, mantene bo mes saludabel y ta prepara! Sigui nos riba nos red nan social pa mas conseho di salud y siguridad.
