Campeonato U17 fast pitch femenino di Aruba Softball Bond a continua riba canchanan na Pos Chiquito. Manera ta conosi Aruba Softball Bond a inicia cu su Liga U17 femenino y e idea ta pa den 2020 crea un Liga extra esta U15 femenino y asina cumpli cu maneho riba plataforma mundial desaroyando nos muchanan na un edad mas jong.
Den categoria aki di U17 e equipo di San Nicolas di Carmelita y Marina esta Eagles a baha fuerte riba e equipo di Noord esta Lady Blue Marlins. Eagles a score 1 careda den bom di promer inning y a amplia esaki cu 9 careda den bom di dos y despues ta anota 4 careda mas pa derota Lady Blue Marlins 14-0. Eagles 14 careda, 6 hit, 1 error y ta laga 5 coredor na base. Lady Blue Marlins 0 careda, 1 hit, 5 error y ta laga 5 coredor den circulacion.
Mihor bateadornan pa Eagles ta Xiorcaniyx Vargas di 3-3, Keyla Cham y Yee Mei Cheong ambos di 2-1, Ashmilayne Maduro di 3-1. Pa Lady Blue Marlins a conecta e unico hit pa su equipo Carolina Kelly kende a bay di 1-1. E hoben Yee Mei Cheong a resulta pitcher ganador lansando un “one hitter” enfrentando 17 bateador tirando 30 bola, 45 strike pa un total di 75 lansamento propinando un total di 9 strike outs regalando 3 base por bola y por mira atras riba un performance excelente riba monticulo. Marylaine Ignacio ta bay cas cu e derota lansando 27 bola, 15 strike pa un total di 42 pitch permitiendo 1 hit, 6 careda y 5 base por bola.
Carolina Kelly ta drenta di relevo tirando 66 lansamento y ta permiti 8 careda tras di 5 hit y ta regala 5 base por bola. Campeonato U17 ta continua diahuebs awor pa 7pm sharp sharp na Pos Chiquito momento e muchanan di Sta Cruz esta Rockets U17 midi forsa contra e muchanan di Noord esta Lady Blue Marlins. Un categoria cu sigur fanaticada mester respalda. Diabierna 6 di September den categoria mayor pa 7pm Rockets vs Eagles y pa 830pm Aruba Bank Lady Tigers vs Jaguars Vitamin Water. Diasabra 7 di September pa 3pm Lady Blue Marlins vs Eagles (U17) y pa 5pm Jaguars Vitamin Water vs Eagles ( Mayor). Pues fanaticada e siman aki nos tin compromiso cu softball femenino na Pos Chiquito. Softball a la carga!!
