Desde mainta parlamento a trata e ley di Landsverordening Instelling Ministeries 2022 (LIM). Durante reunion e parlamentarionan por a haci nan pregunta despues di a tende cada mandatario. Parlamentario di AVP Santos do Nascimento a trece su preocupacionnan dilanti.
mr.dr. Rycond Santos do Nascimento, parlamentario di AVP, a indica cu minister Dangui Oduber a reclama cu el a haya tiki pregunta. Pero e parlamentario di AVP a splica den su desertacion di su preocupacionnan y no a haci pregunta directo. E tin varios preocupacion y un di nan ta cu tin minister di Integracion Glenbert Croes cu a la bes ta minister di Labor, pero no tin ningun plan pa cambia e LTU. A base di e LTU e minister di Integracion mester consulta cu minister di Labor pa duna cierto permiso. E pregunta cu su persona ta haci ta con e minister por bay consulta cu e otro minister. Aki el a referi cu Glenbert ta bay consulta cu Glenbert, y esey ta cosnan hopi practico cu mester cambia den ley.
Tambe el a cuestiona e uzo di mandato. Pasobra hopi biaha gobierno ta papia di uza mandato como instrumento pa depolitisa, tambe a scucha prome minister a bisa esey den cuadro di DIP. El a expresa cu simplemente esey no ta berdad, pasobra por mira un instrumento di mandato y den e caso ey “bo ta podera un ambtenaar pa tuma decision den bo luga, pero minister ta keda responsabel”. E minister ta keda cu e poder pa interveni y na momento cu e ciudadano no ta contento cu e decision, por bay den bezwaar (obhecion) cerca e minister y no ambtenaar.
Pa un cobertura mas amplio lesa e edicion di TREMPAN di mañan.
