E situacion tristo di Korrektie Instituut Aruba (Aruba) ta algo cu tin atencion di Minister di Husticia Rocco Tjon y tambe di Hulanda. Recientemente durante e bishita di Minister di Proteccion di Derecho di Hulanda, Franc Weerwind, e tema aki a bini dilanti tambe.
E situacion di KIA ta penoso y a keda demostra un biaha mas cu e cantidad grandi di droga intercepta prome cu el a drenta Aruba.
E delincuentenan gara no ta desconoci aki na Aruba. Ta personanan cu a drenta di forma ilegal y saca bek. Dialuna mainta a puntra e Minister di e situacion aki, pero el a bisa cu te cu e momento ey e no tin conocemento cu trata di personanan cu tabata na Aruba caba, of envolvi den contrabanda di hende.
E mandatario a bisa cu pa loke ta siguridad na frontera, Gobierno hunto cu ayudo di Hulanda ta sigui inverti pa brinda e siguridad necesario. Pa loke ta e echo cu ta menciona cu ta trata di personanan cu a yega di bini Aruba caba cu ta envolvi den e cargamento, ta algo cu e no tin informacion di esey.
SI e ta admiti cu KIA ta keda un reto pa Aruba. Pa yega na un solucion duradero, mester bini cu un KIA completamente nobo, cu mas espacio, pero tambe pa brinda e diferente tipo di cuido necesario na e detenidonan.
No mester lubida cu e rapport traha door di un comision di Hulanda a demostra cu tin hopi deficiencia den e instituto, no solamente den e infrastructura, pero tambe no ta brinda e servicio cu e detenidonan mester haya, entre otro pa rehabilita y drenta comunidad bek.
Durante e bishita di e mandatario Hulandes, el a bishita e instituto tambe pa mira cu su mesun bista e situacion. El a pidi Minister Tjon pa un rapport. Den cuadro di esaki Minister a bisa den e conferencia di dialuna mainta cu e dossier ta casi cla y e luna aki ainda lo mand’e pa Minister Weerwind. E titulo di e dossier ta Un KIA Nobo. Den cuadro di esey lo tuma un decision con ta bay financia realisacion di un Kia nobo.
