Linda Orman ta pertenece na un task force di taxi y a trece dilanti cierto informacionnan pa asina no ti mal comprondemento. Nan grupo di taxi semper tabata tin bon comunicacion. Den e Gobiernonan anterior nan tabata reuni cu e ministernan. Tabata trece e problemanan cerca e ministernan, e problemanan cu tabata creciendo y kico por a cambia, etc. Cu e minister anterior, nan tabata tin comunicacion. El a bay asina hasta cu tempo cu tabata tin reunion pa all inclusive, su colega Shamila Loefstop hasta a busca firma riba e pensamento di e taxistanan riba all inclusive y a trece esaki cerca e ex minister di turismo, pa mustra e ora cu tabata tin comunicacion habri. No tabata tin porta cera pa nan. Nan por a acerk’e. Si e tabata kier feedback, tabata dun’e esaki y si tabata kier cosnan pa drecha y facilita mas e trabao di taxista, tabata posibel tambe.
Naturalmente no ta tur cos ta 100% perfecto, pero e sistema tabata traha. Despues cu e firmanan di all inclusive a wordo entrega, algun siman despues nan a bin mira den corant cu a sali un MB dia 26 di Mei, 2016. Lesando e, por a mira cu cierto articulo ta kita e derecho di e taxistanan. E derecho eynan tabata overschrijving pa un miembro di famia. Di biaha nan a reuni entre nan, cierto gruponan tambe a reuni. Nan tabata full un bloke di mayoria di e gruponan di taxi. Nan a bisa cu esaki no por, pasobra hopi hende no a pone atencion riba dje. Pero cierto di e taxistanan si a ripara e articulo 2 di e MB eynan.
Nan a reuni y a haci un conferencia di prensa y a anuncia cu esaki tabata un sorpresa desagradabel, pasobra si e liña di comunicacion tabata habri, nan no a wordo avisa prome cu el a wordo publica, kico tabata e intencion di e minister pa haci’e. Na momento cu esaki a sali den media, mesora a wordo yama pa presente na e oficina di minister. A bay e reunion aki y e minister a vocifera kico e tabata kier, pakico a bay contra di dje y a splik’e cu no a bay contra di e minister, pero e minister a publica algo sin cu e taxistanan tabata na altura di dje. E ora eynan el a haci su promesanan cu toch e ta firma, etc. Pero e taxistanan, na e momento eynan ta bisa cu locual cu ta poni preto riba blanco, ta esey ta conta. Orman a sigui menciona cu nan a sali for di e reunion eynan desepciona y e ora nan a sinta bek hunto. No a priminti minister nada, no a bis’e nada, a bisa cu a bin pa scucha y esey ta tur. Desde eynan a bin e taskforce. A bin masha hopi polemica den e taskforce mes. E grupo a cuminsa dividi. Locual cu ta conta, Orman a ripiti, ta e MB. A haci e ora, despues di 6 siman, nan bezwaar na LAR y eynan nan caminda a cuminsa.
Mientras tanto nan no a reuni mas cu e minister, pasobra el a keda para ariba. E gruponan di taxi a dura basta pa papia cu nan pa por splica nan, pa papia cu nan, cu un derecho a wordo kita. Awor aki no ta facil pa haya e taxinan, pasobra nan ta traha. Tin cu tuma tempo pa comunica cu tur, pasobra e splicacion tin cu haci’e personal, splica bon pa nan por compronde bon kico e meta tabata.
E taskforce a lanta. Tin cu a cay na caminda. Nan no a sigui cu e taskforce y a keda e ora, locual ta Linda Orman, Henry Franken, Ronny Gomez, Joseph Croes, Shamila Loefstop, Candy Geerman y Shannon Lewis. Nan ta esnan cu a keda den e taskforce y keda preserva y keda bringa pa taxistanan haya nan derecho bek.
Ultimamente, despues cu e minister a tuma su retiro, a haya oido di minister Eman. Nan a haya un meeting cun’e. E ora a mustr’e kico tabata nan puntonan y a papia tambe di mas otro cos cu nan ta haya cu mester a wordo regla, cu ta falta pa wordo drecha ainda. Nan a reuni cun’e y debi cu nan mester a haya contesta bek, el a tarda. Tabata tin mas grupo cu tabata reuni cu prome minister y despues awor aki cu nan a keda reuni cun’e, dos of tres biaha mas, awor aki nan a bin haya e intrekking di e MB.
Orman a splica cu e intrekking di e MB no ta un fabor nan a haci. E ta un derecho cu e taxistanan a perde y e derecho aki a busca y a hay’e bek. No ta pa nan so sino pa e 450 taxi cu a logra pa haya e derecho aki bek.
