E fecha 18 di Maart ta core den historia di Aruba den forma a-politico

Aruba un bes mas ta bay celebra en grande su Dia Nacional. Su Dia di Himno y Bandera. Na un momento asina special den historia di Aruba ta bon pa para keto un rato riba escogencia di e fecha 18 di maart.

A scoge pa e fecha aki pasobra ta riba 18 di maart 1948 cu Conferencia di Mesa Rondo na Den Haag, a aproba e mocion, entrega pa Shon A Eman, pa autonomia di Aruba. Na 1973, Betico Croes (dfm) a lidera un manifestacion masal exigiendo nos Status Aparte.

Un lucha cu a start ya na inicio di siglo pasa ora cu Henny Eman sr. a inicia e movecion ‘Baas den nos mes cas’. Pa e motibonan aki, tur partido di prominencia na Aruba den decada 80 a sostene e nominacion pa haci 18 di maart tambe e fecha cu nos ta celebra nos simbolonan patriotico.

E anuncio aki di parti di Betico Croes a bay pa historia. E fecha den cual a inaugura nos bandera y a oficialisa nos himno. A scoge e fecha aki y a bisa specificamente cu ta pa su balor historico; esey ta pone cu e fecha aki ta core manera un liña cora den historia di Aruba den un forma apolitico, cu tur partido na Aruba, esnan di prominencia a identifica nan mes cu e fecha aki for di cuminsamento como un dia nacional cu ta marca hopi momento cu Aruba a bini hunto.

18 di Maart ta un fecha nacional cu tur partido na Aruba por brasa paso e ta touch e curason di cada ciudadano y generacion di Arubianonan.  Manera tur aña, na e monumento 18 di maart,  banda di Lagoen, ta bay tene un ceremonia solemne caminda un bes mas ta recorda e 2.147 hombernan cu a firma na 1947/1948 – den un tempo cu no tabatin e facilidadnan cu tin awe –  pa sostene e mocion cu Shon A Eman a entrega na Hulanda durante un Conferencia di Mesa Rondo.

Comments

comments