Tabata dia 1 di mei 2022 cu Alfredo Koolman a asumi e funcion di Chief Executive Officer (CEO) na Water-En Energiebedrijf Aruba (WEB) N.V.
Pero, ta parce cu el a asumi su rol cu e pia robes, pasobra un luna despues cu el a sinta, na juni 2022 ya tabatin un blackout. Y asina a sigui dos den un dia na augustus y otro na november. Aña 2022 tabata un aña record pa WEB cu no menos di cinco blackout! Esey no tabata tur pasobra den aña 2023 atrobe tabatin, aunke tabata un so, dia 27 di januari.
Y despues di casi un aña, awe dia 21 di januari 2024, a bolbe paralisa nos economia pa un otro fayo den e central relativamente nobo y moderno di WEB.
Awe ainda no ta menciona e motibo exacto di e interupcion. Asja Dongen, vocero di WEB a sigura cu ainda no sa e causa exacto di e fayo. “Awo cu e suministro ta 100%, ta sigui cu e proceso di root cause analysis pa asina haya sa y pa tuma paso pa evita cu esaki ta ripiti”.
Mester menciona cu dia 28 di december ultimo, menos di un luna pasa, tabatin un brownout di cual casi henter Aruba a keda sin suministro di coriente. Coriente a bay pa 5:00 pm y a bin bek despues di mas o menos dos ora y mey. E dia ey a bisa preliminarmente cu tabatin un corto circuito den e transformador na WEB. A keda di investiga pero nunca mas a sali pa splica pueblo e causa exacto, ni ken ta responsabel y si un hende a asumi responsabilidad pa e daño cometi na nos economia.
E percepcion den pueblo ta, mas WEB inverti, mas moderno haci e planta di produccion, mas fayo ta tuma luga y mas inconveniencia pa usuarionan. Berdad ta cu despues di brownout of blackout coriente ta bin mas lihe, pero tampoco ta normal cu ta confronta un paro di nos economia asina frecuente.
