Jose Dania, miho conoci como “Joe” a fayece awe marduga na cas. E tabatin algun dia ta lucha cu e salud, pero curpa a cansa awe y a dicidi cu ta basta. Joe Dania ta un di e hombernan cu e edad mas halto na Aruba, e tin 102 aña. Alabes e ta e pensionado di WEB cu e edad di mas halto.
Te na ultimo e tabata bon para riba su pianan, bon na tino, fiel oyente tur merdia di Enfoke 90 cu nos colega Nelson “Speed” Andrade, deboto grandi di Misa di Dakota y un Dakotero di “pura sepa”.
Joe ta tata di Ito, Ingrid, Gladys, Lando, Rubia y Eugenne. Na su cas ta yega regularmente amigonan manera Magda, Zelda y Godfried.
Joe Dania ta tata di e tumbero conoci Ito Dania, cu den añanan 80 a acapara atencion cu su estilo unico “Ata e tumba mi pueblo”.
Awe ta un dia tristo pa Dakota, pa empleadonan di WEB y pa misa di Dakota. Hopi forsa na henter famia Dania.
