Departamento di Salud Publico (DVG) a emiti un comunicado di prensa den cual ta anuncia cambionan den e procedura pa comunidad registra y ricibi vacuna contra Covid-19. DVG ta argument cu e ahustenan aki den e campaña di vacunacion ta pa hisa e capacidad di vacunacion, realoca empleadonan y introduci cambionan organisatorio cu ta resulta den mas eficiencia. Ta pidi un y tur pa tuma bon nota.
Entrante diamars 6 di april, Don Bosco Club na Noord lo no fungi mas como un prikpost. E dos localidadnan cu lo sigui fungi como prikpost ta Centro Libertador Betico Croes na Santa Cruz y Santa Teresita Center na San-Nicolas di dialuna pa diasabra for di 8:30 am pa 7:30 pm non stop.
E siman di 5 pa 9 di april ta e ultimo siman cu comunidad por acudi na MFA Santa Cruz, MFA Paradera of MFA Noord pa ayudo cu registracion. Entrante dialuna dia 12 di april, lo no tin servicio di registracion disponibel mas na ningun MFA.
Entrante diamars 06 di april orario di vacunacion na e prikpost Centro Libertador Betico Croes y tambe Santa Terista Center lo ta di 8:30 am pa 7:30 pm non stop.
Entrante dialuna dia 12 di april, es cu kier registra pa vacuna ta wordo incurasha pa haci esaki via Aruba Health App, via www.dvg.aw of www.arubacovid19.org. Es cu no por por registra via e sistemanan aki riba menciona, por acudi na prikpost Centro Libertador Betico Croes na Santa Cruz of na Santa Teresita Center na San-Nicolas pa ayudo cu registracion entrante 12 di april.
E servicio di ‘Walk In’ sin cita ta sigui vigente unicamente pa cuidadanonan di 60 aña of mas. Tur otro cuidadano bou 60 aña mester tin un cita pa wordo vacuna.
Cuidadanonan indocumenta (ilegal) bibando na Aruba cu ta desea di vacuna por haya ayudo cu registracion tur diahuebs na HIAS Aruba situa na Arendstraat 116 telefoon 7307770
Cuidadanonan cu ta bibando, laborando, studiando of ta stage pa tempo largo na Aruba y cu no tin AZV por registra den e siman di 5 di april ainda na un MFA. Entrante e siman di 12 di april e personanan aki mester registra na prikpost Centro Libertador Betico Croes of na Santa Teresita Center.
