Despues di a dera nan mama diasabra, awe e yiunan di defunto Sofia Croes a reclama tanto riba red social como tambe den conferencia di prensa di MEP, cu Crisis Team y DVG a comete un blunder cu entieronan. Esaki pasobra no tin un ley cu ta bisa cu no por habri caha di esunnan cu muri di covid. A insisti pa dera nan mama cu nan mesun custumber y no cu maneho estableci. Den esaki Aurora Funeral Home no tabata dispuesto pa coopera pero Olive Tree si, pa cual awe DVG a hay’e ta aclaria nan maneho y acuerdo cu e funerarianan.
Desde maart di aña pasa, Dienst Warenkeuring en Hygiëne y Medisch Beleid di Departamento di Salud Publico ta den contacto cu tur tres (3) funeraria na Aruba, esta Aurora Funeral Home, Ad Patres Funeral Home y The Olive Tree Funeral Home. A delibera ampliamente riba e maneho y protocolnan pa esunnan cu fayece di covid. Na april 2020 DVG a reuni cu tur e tres (3) funerarianan menciona pa splica e maneho conforme e “guideline” di e organisacion mundial di salud y protocolnan di DVG pa cu maneho y entiero di esunnan cu a fayece cu COVID-19 y durante e reunion a yega na palabracionnan concreto cu e funerarianan.
Den e guia di WHO no ta para cu no por aregla of prepara un curpa pa entiero y tampoco cu caha di un defunto mester ta cera. Pero como cu na inicio di e pandemia tabatin hopi temor pa cu transmicion di e virus, tur tres (3) funeraria: Aurora Funeral Home, Ad Patres Funeral Home y The Olive Tree a bay di acuerdo pa determina cu nan tur hunto ta dicidi pa no habri caha ora ta trata un defunto di covid. Esaki tabata un acuerdo mutuo entre e funerarianan pa proteccion di nan empleadonan.
Awe 11 luna despues DVG a tuma nota cu un funeraria awor si ta di acuerdo pa regla of prepara esun cu a fayece di covid, mientras por tuma nota cu tin funeraria cu ainda no ta desea di haci esaki. Cu awe un funeraria ta cambia di pensamento ta nan prerogativo. Maneho interno di cada funeraria ta keda den man di cada funeraria pero tawata na su lugar si pa a informa DVG y Crisis Team di e cambio aki prome y no di un momento pa otro despues di dera 67 persona for di maart 2020, segun e acuerdo haci.
Durante un entiero cu recientemente a tuma lugar, Crisisteam a tuma e decision di laga cera e caha di morto durante entiero den misa. Esaki pa motibo manera a indica caba, 67 persona a wordo dera bou acuerdo haci na 2020 y considerando cu den ningun entiero di un persona cu a fayece di covid e caha tawata habri den misa. Pues Crisis Team a aplica e principio di un trato igual pa tur e 68 defuntonan cu a fayece di covid. DVG tin comprencion pa e sentimientonan di famianan di tur esunnan cu perde nan sernan keri pa motibo di e pandemia.
