Dialuna mainta a tuma luga un reunion publico caminda cu tabatin un solo punto di agenda treci dilanti pa Minister di Husticia y Asunto Social, Rocco Tjon.
Ta trata aki di un cambio den articulo LXIV, seccion RR di e proyecto, caminda cu e prome letter di e articulo 94 lo a keda lo siguiente:
Respetando custodia, articulo 90, cu excepcion di e di cuater pa e di seis, lo ta aplica aki.
Di e seccion RR di articulo LXIV, articulo 94 ta cambia. Sinembargo e prome letter no ta corecto tecnicamente, pasobra e ta referi na un articulo cu no ta existi den e Codico di Procedura Penal nobo. Cu e cambio aki, e erornan tecnico legal lo ta coregi.
Durante di e reunion publico aki, parlamentario di fraccion di RAIZ, Misha Raymond, a trece varios punto dilanti den su disertacion. El a indica cu el a tuma nota di e rapport di CPT, unda cu nan a indica nan preocupacionnan tambe p’e celnan na Shaba y mirando kico a transcuri durante e ultimo dos aña pa loke ta suicidio, e pregunta ta si mester duna mas atencion riba esaki a corto plaso, mirando cu cierto situacion a bin ta tuma luga caba.
No ta un secreto cu tin falta di personal of structuralmente ta tuma mas tempo pa introduci cambio, pero ta papiando aki en berdad di Derecho Humano.
Di su banda, minister Rocco Tjon a indica cu loke e presenta na parlamento ta cos realistico, cos cu por. Tjon a bisa cu e ta hopi abierto cu parlamento pa loke t’esey y e problema di e capacidad di detencion, e problema di falta di personal no lo bay soluciona di un dia pa otro.
Despues di tabatin votacion riba e ley caminda cu claramente por a mira cu e Parlamentario di Raiz a abstene di a vota, a pesar cu e tabata presente den sala.
Finalmente a aproba e ley cu 16 na fabor y 1 contra.
