Entre dianan 10, 11 y 12 di augustus ultimo a tuma luga e fiesta conoci como “Antilliaanse Feesten”. Ta di 40 aña cu ta organisa e fiesta aki na Hoogstraten, na Belgica, den cual ta tene tres dia di bachata, reggaeton y salsa. Un di e cantantenan invita tabata Jeon di Aruba, cu a canta durante e evento di diahuebs. Ey Minister Plenipotenciario di Corsou, Carlson Manuel, a subi escenario y a regal’e un obra di arte di Corsou, como muestra di gradicimento pa tur loke e ta haci pa promove e islanan Aruba, Boneiro y Corsou den tur presentacion y cancion.
E mandatario den su discurso a bisa cu “Mi a bini awe pa gradici bo, Corsou, Aruba, Boneiro, tur caminda cu bo bay, bo ta menciona. B’a hiba nomber di Corsou, Aruba y Boneiro tur caminda internacionalmente. Y ta p’esey, den nomber di Gobierno di Corsou aki na Hulanda, nos kier duna bo un piedra di Corsou, pa tur caminda cu bo bay, bo tin Corsou hunto cu bo”. E mandatario Yiu di Corsou ta considera Jeon un berdadero Embahador di Corsou, Aruba y Boneiro na Hulanda. Tambe el a bisa acerca cu e tipo di reconocementonan asina mester duna hende ora nan ta na bida, p’esey el a opta pa haci esaki awo.
“E ta sinti bunita pa tin un pida baranca di nos isla precioso,Corsou, danki!”, asina e cantante Rubiano a bisa mientras e tabata mustra e obra di arte na e publico grandi cu tabata presente na e evento. Jeon ta presenta regularmente na nos islanan ruman Corsou y Boneiro pero tambe ta bishita Hulanda cu masha frecuencia. Awo mes el a keda como un luna largo eynan, den cual el a tene un tour na varios pais den Europa, entre otro Hulanda, Francia y Belgica.
Tocante Jeon
Jonathan Bryan Thiel, conoci artisticamente como “Jeon Arvani”, ta naci na Aruba dia 27 di januari 1991, pues tin apenas 32 aña di edad. El a produci riba 500 cancion durante su carera musical, cu ta inclui albumnan manera Biggy Boy Forever, Santa Cruz y Otra Noche.
Na aña 2018 el a graba e hit “Machika” cu J Balvin y Anitta. Hunto a logra un “Platinum Album” mientras cu a stream e cancion mas di 100 miyon biaha riba Spotify den mas di 60 pais rond mundo.
E ta conta cu nominacionnan pa “Latin Grammy Award for Record of the Year” y “Lo Nuestro Award for Urban Collaboration of the Year” cu e cancion “X” di Nicky Jam y J Balvin na aña 2018. El a yega di presenta cu concierto di Chris Brown, Don Omar, J Balvin, Romeo Santos, Juan Luis Guerra, Gente de Zona, Zion & Lennox y hopi mas.
Localmente el a lansa megahitnan manera “Dushi bida” y “Ta mi hendenan”. Na aña 2016 el a gana e premio di artista, cancion y video di aña, pa e cancion “Dushi Bida”. Na 2017 Tourism Corporation Bonaire a reconoc’e cu e medaya di oro como embahador. Na 2018 a reconoc’e como embahador di Corsou.
Jeon awendia ta trahando duro pa su comeback internacional, despues di contratiempo den pandemia, perdida inespera di su ruman muhe y retonan cu su mesun salud. Den e siguiente lunanan lo tende hopi mas di dje, na Merca, Europa, pero tambe den Latino America na unda e ta trahando riba diferente proyecto simultaneamente.
Tocante Antiliaanse Feesten
E prome dia di evento, diahuebs, a conta cu presentacion di Jeon for di Aruba y Troy for di Cuba. E banda ta toca tur tipo di musica, pero specialmente dancehall, salsa, bachata y reggaeton. Diabierna a conta cu presentacion di Kassav’, Estrellas de buena Vista y Mas, Grupo Extra, Haila, Diablo Dybala, Oswald Band, Damian the lion, TSean y Nils Fischer & Timbazo. Riba diasabra e publico a gosa di Patrice Roberts, Vayb, Jose Alberto el canario, The Latin Brothers, Cache Royale, Chocolate Remix, Rootsriders, Passion, Quique y Ricky Manuel. Entrada pa diahuebs a costa €35, mientras cu pa diabierna y diasabra mester a paga €65 pa drenta.
Tocante Carlson “Carls” Manuel
Carlson “Carls” Manuel ta e actual Minister Plenipotenciario di Corsou na Hulanda. E ta ocupando e funcion desde juni 2021. El a studia na Universidad di Rotterdam y na Codarts Rotterdam. E tin un “bachelors degree” den IT, Business Management y musica. Tambe e ta posee un “master’s degree” den musica como docente.
