For di comienso di november Dienst Uitvoering Onderwijs (DUO) ta presente na Aruba y Corsou. Den e prome 2 simannan DUO a yuda centenares di ex y futuro studiante pa medio di informacion y combersacionnan personal. E 2 simannan venidero tambe colaboradornan ta para cla riba e islanan pa yuda personanan cu un solucion adecuado.
Den e prome siman di bishita DUO a tene diferente encuentro di informacion pa futuro studiantenan y pa esnan cu mester paga bek. Ademas DUO a habri oficinanan di servicio temporal. Aki personanan por acudi cu tur pregunta tocante financiamento di estudio Hulandes y pagamento bek di nan debe di estudio. Tambe tin combersacionnan ta tuma luga na e oficinanan di servicio cu personanan cu tin atraso den pago pa yega na un areglo di pago na midi.
Pagamento bek segun forsa
Monique Hoogerwerf ta coordinador di e area Caribense na Duo y ta mira cu e simannan cu a transcuri a yuda hopi hende cu problema di pago cu un combersacion personal den un di e oficinanan di servicio. Hoogerwerf: “Loke hopi hende no sa, ta cu DUO ora di calcula e montante mensual, por tene cuenta cu entrada di un persona. Bo ta paga e ora ey bek segun ‘forsa’.” Un ex-studiante mes mester pidi si pa baha e montante mensual.
Hoogerwerf: “Hopi hende despues di a entrega informacion tocante nan entrada ta paga un suma mensual mas abou of tin biaha te hasta no mester paga nada mes. Cerca hopi ex-studiante nos ta mira un alivio grandi cu a yega na un solucion pa nan retraso den pago. Mi lo kier a bisa tur hende cu un retraso den pago cu ainda tin duda: Tuma contacto cu nos. Nos por yuda bo!”
Bishita na oficinanan di servicio
E oficinanan di servicio na Aruba y Corsou ta habri ainda te cu 26 di november. For di 29 di november te cu 10 di december DUO ta bishita Boneiru tambe. Pa haci un bishita na un oficina di servicio no tin mester di traha un cita. Personanan cu mester paga bek mester bin si cu un tarheta di identificacion y un resumen di nan entrada- y gastonan. Wak pa sitio- y oranan cu ta habri riba duo.nl/bezoekantillen.
DUO ta ehecuta pa ministerio di OCW entre otro ley y regulacion riba tereno di financiamento di institutonan educacional, dunamentu di financiamento di estudio y compensacion pa gastonan escolar, cobransa di debenan di estudio, y maneho y intercambio di datonan mara na e number di enseñansa,.
