Den e ultimo lunanan di 2022 nos a conoce hopi yobida. Un banda e ta bon pa motibo cu e damnan ta yen, Aruba ta mustra mas berde. Pero e consecuencia e ta trece cu ne, ta cu e matanan ta crece hopi y ta crea peliger den cierto area.
Evelyn Govaart ta preocupa p’e situacion di Cunucu Abou y e ta haya esaki ta uno fastioso. Esaki ta bin desde cu e matanan a crece, nan ta crea peliger pa visibilidad di e automobilistanan. Pero tambe pa e ciclistanan como esunnan cu ta pasa eybanda na pia.
Na e crusada por a nota con e matanan ta stroba visibilidad p’e automobilistanan. Hopi mata a crece, pero tambe tin yen palo. E ta pidi pa DOW haci e area limpi, p’asina yuda cu visibilidad. Asina tur hende por haci uzo dje caminda aki, na un manera mas trankil.
Pero no ta na Cunucu Abou so por mira e situacion aki. Otro parti rond Aruba tambe tin e problema cu e matanan a crece di mas y e takinan ta colga te riba caminda. Esey ta ocasiona cu na momento di pasa mester maniobra pa e taki no dal e auto, pero tambe percura pa no dal trafico contrario si tin e momento ey.
