Siman pasa 21 te cu 26 di juni despues di mas cu binti aña a tuma luga un torneo di internacional di Basketball na Aruba cu a carga e nomber “Aruba Hoops on Fire”. Varios pais invita manera Curaçao a bin cu cinco team total Excel Basketball, Huskies Basketball, Sharks Basketball y tambe un team di Colombia Vaqueros Basketball nan tur a participa midiendo forsa contra otro pa mira cua lo bay cu e maximo premio.
Aruba Basketball Bond conhuntamente cu The Sports Unlimited Foundation (Stealers Basketball) a traha hunto pa trece un torneo internacional di caliber pa duna e teamnan local di Aruba un experencia con un torneo ta di Basketball.
Un participacion di 100% di e teamnan local a yuda engrandece e torneo. E teamnan manera Sportverening Aruba Juniors, Club Estrella, Impact Basketball, Dream y Stealers basketball hunto cu e teamnan internacional a participa den tres categoria, U13, U16 y U19. Un gran fanaticada di Curaçao a acompaña e cinco teamnan, nan a trece un ambiente fenomenal den dos facilidad na Aruba cu ta YMCA San Nicolas y Aruba Juniors na Oranjestad.
Un total di mas cu 40 wega mester a tuma luga den cuater dia pa saca e ganadonan maximo. Mester bisa cu tur dos facilidad por a gosa den un bon asistencia di parti di fanaticada di cada team tanto local como internacional. Den e diferente categorianan tabata tin un mescla di teamnan local y internacional. Den e categoria di U13 tabata tin shete team consistiendo di dos poule, uno cu cuater team y e otronan cu tres. Sharks, Huskies, Impact, Aruba Juniors cu dos team y Stealers basketball a bataya pa wak kendenan lo tabata e top cuater teamnan pa bay play-off. Finalmente tabata Huskies, Aruba Juniors, Dream y Stealers a bay play-off. Prome luga a keda Stealers Basketball, di dos luga a keda Dream Basketball y na di tres luga a keda Aruba Juniors.
Den e categoria di U16 tabata tin mas ekipo, un total di ocho ekipo tabata parti den dos poule. Den e categoria aki tabata tin Sharks basketball un team cu e atletanan experiencia internacional a bin bon prepara, Excel Basketball un ekipo cu pa prome biaha ta participa den un torneo pafo di Curaçao tambe a mustra un basketball di bon nivel. E team di Colombia Vaqueros, un team completo cu un tremendo full court pressure defense, a duna tur team dolor di cabes. Pa cera e division aki cinco team di Aruba a bataya pa mira kende lo bay play-off. Finalmente cuater team a bay play-off cu Vaqueros Basketball canando na prome luga hungando un tremendo basketball, sigui pa Stealers Basketball na segundo luga y finalmente Sharks Basketball di Curaçao na tercer luga.
Den e categoria di U19 tabata tin menos ekipo pero asina mes tur ekipo a duna e maximo esfuerso pa tuma e prome luga. E teamnan participante den e categoria aki tabata Excel Basketball di Curaçao y tres team di Aruba cu ta Aruba Juniors, Club Estrella y Stealers Basketball. Mester bisa tambe cu den a categoria tabata tin tremendo show di dunk di parti di diferente atleta manera Luis Cabrera di Stealers, Simeone di Aruba Juniors y di Curaçao Ivan Martijn. Publico a gosa di e hugadanan aki.
E resultado di den categoria tabata na prome luga Stealers Basketball, na di dos luga Club Estrella y na tercer luga Aruba Juniors. Durante e torneo di Aruba Hoops on Fire tambe a tuma luga despues di basta aña tabata tin un wega di exhibicion consistiendo mucha muhenan so. Aki tambe a participa dos tremendo atleta di pafo di Aruba. Un atleta femenino di nos hermana isla Curaçao y tambe un atleta femenino di Colombia. Esaki tabata un tremendo gesto di e organisacion pa habri e luga pa e dos atletanan aki participa den e torneo.
E atletanan local a haya un experiencia inolvidabel, pasobra despues di basta aña nan tabata parti di un inicio atrobe di basketball pa e ser femenino. Mester bisa cu Aruba Basketball Bond y Stealers basketball por ta satisfecho con e torneo a transcuri e cuater dia. Tur atleta a gana experiencia durante e torneo aki. Ta di spera cu otro aña 2024 e torneo aki sigui.
