COVID-19 a yega Fatima College, consecuentemente tin klasnan den cuarentena. E alumnonan a bay den cuarentena desde 16 di januari te cu 26 di januari. Nan ta den cuarentena pa controla si nan ta desaroya sintomanan di COVID-19.
E presencia di COVID-19 den enseñansa ta preocupante pa scolnan. Dialuna scol ta cuminsa cu dos klas cera, esta klas 5 y 6. Aunke cu a cera dos klas, e deseo di docentenan y dirigente tabata pa cera henter scol pa dies dia. Muchanan di e dos klasnan aki lo ta bek na scol dia 26 di januari. Como parti di protocol, mester keda cas y no por ta riba caya durante e dianan cera den cuarentena. Tambe ta pidi si tin mas mucha ta sinti cualkier sintoma, pa mayor avisa scol mas lihe posibel.
E alumno cu a test positivo, a pasa den diferente klas pero a pasa mas tempo den klas 5 y 6. Esey ta e motibo cu scol a drenta den accion y pa evita cu e virus sigui plama. Tambe e werksternan di scol ta bay desinfecta e klasnan den un forma profundo pa ora e muchanan regresa bek na scol. E mayornan tin tur informacion. E maestronan di Fatima College no tin COVID-19, pero contrario na otro scolnan si tin maestronan contagia di e virus.
E atencion di maestronan riba speelplaats y entrada semper t’ey, pasobra nan ta haci nan maximo esfuerso pa evita pa no tin distancia social. Pero den klas e muchanan ta sinta den grupo y cu nan mondkapje na tur momento. Cu dos klas menos scol ta habri mañan, pero si cos bira mas serio e ora ey lo tuma accion. Aki nan lo haya instruccion di DVG pa cera e scol completo, pero pa awo ta mantene dos klas cera.
