Diabierna anochi polis atrobe a haya nan mes cu man yen atendiendo diferente sucedido rond di nos isla. Mirando cu temporada di dianan di fiesta ta acercando, cayanan sigur lo ta hopi mas activo e dianan y simannan nos dilanti. Den oranan di anochi mardruga rond 1:35am, polis mester a bay over na detene dos persona rond area di Linear Park.
Nan tabata aparentemente sinta banda di caminda na area di Linear Park anto polis a bay over na control nan. Ta na e momento aki cu algun di nan a cuminsa core. Polis a start un persecucion na pia anto a logra gara dos di nan. A listra e hobennan aki caminda un di nan tabata tin un arma blanco, anto e otro a haya varios otro cos den su posesion.
Polis a bay over na detene ambos hoben maske un tabata leu for di e otro, debi cu un a purba di huy pero esaki no tabata exitoso. Transporte policial a presenta na sitio y bay over na transporta e hobennan aki pa warda di polis pa topa cu subfiscal cu lo atende nan.
