E avion tabata programa pa sali 2:56 pm for di Aruba pa Philadelphia. Ta un avion di American Airlines, riba e vuelo AA-534. El a sali poco mas laat, pa 3:22 pm. Pero apenas mey ora den aire, e capitan a nota cu tin un problema cu e porta di avion y no kier a core ningun risico. A bati alarma y pidi pa e haci un aterisahe di emergencia na Aruba.
Ta trata aki di un vuelo directo for di Aruba pa Philadelphia, cu un tipo di avion Airbus A321-231. E avion por carga entre 170 pa 200 pasahero. E vuelo tabata yen, pues e capitan mester a deshaci di combustibel riba lama y regresa Aruba pa baha e avion. Ora ta ayterisahe di emergencia asina ta deshaci di mayoria combustibel pa e avion ta mas lihe ora di baha y pa e risico ta menos.
Esey ta duna tempo tambe pa toren di control di Aruba Airport por activa nan plan di contingencia, cu ta encera alarma tur instancia concerno, manera ta polis, bombero, ambulance y otronan. Polis ta percura pa cera tur caminda cu ta hiba bo na e terminal di aeropuerto, mientras bomberonan ta aumenta nan cantidad di trahado na e post situa na aeropuerto, conoci como Post Oscar. Ta spacha tur ambulance disponibel tambe pa aeropuerto, pa si acaso tin un emergencia, por drenta accion y brinda asistencia mesora.
Danki Dios cu ningun instancia mester a activa pasobra den algun minuut e avion a baha na Aruba sin ningun problema. Kico a pasa cu e porta cu tabata manda un señal pa cockpit cu e ta habri of no a cera bon, ainda ta bou di investigacion. Mirando cu tin algo robes, Departamento di Aviacion Civil di Aruba a opta pa “ground” e avion mesora, te ora cu tecniconan por garantisa cu e fayo ta drecha y cu lo no tin ripiticion. Bisando esey, a cancela e vuelo di awe y e pasaheronan mester keda Aruba. Esey riba su mes ta un reto pasobra hotelnan no por garantisa cu nan por haya nan mesun camber bek, debi cu e temporada halto ta drentando y ocupacion ta halto na mayoria hotel riba nos isla.
Mester menciona cu awor tin no menos cu dos avion di American Airlines na tera na Aruba, mientras cu mecaniconan ta purbando pa drecha e fayonan pa e avionnan por cuminsa operacion atrobe. Diabierna tabata un reto cu motor # 1 cu a pega na candela. E avion ta staciona na Aruba ainda y no tin un dia pa keda cla pa por cuminsa bula bek. E otro avion di awe ta apenas a cuminsa investiga e fayo.
