Un total di 2 caso nobo di COVID-19, di cual tur ta residente, (“positivity rate” bou residente ta 13%), mientras 13 persona mas a recupera. E total di casonan activo awe ta 164, y total di testnan haci ta 200, testnan haci bou di residentenan na laboratorio di hospital ta 15. E total di casonan di fayecimento relaciona cu COVID-19 ta 36.
Cifranan di casonan positivo hunto cu e “positivity rate” ta bahando y esey ta un indicacion cu e transmision ta sosodiendo riba un forma limita y manehable. Esaki sigur ta un hopi bon señal. E virus di COVID-19 lo no desaparece pa awor y e yabi den e pandemia aki ta pa controla e cantidad di contagio of transmision pa preveni cu e cantidad di casonan ta subi demasiado den un corto tempo.
Hospital ta informa cu tin un total di 12 persona interna di cual 1 den Cuido Intensivo y 11 ta isola riba piso general.
Pa sigui controla COVID-19 ta importante pa comunidad ta alerto y na prome indicacion di sintoma tuma contacto cu dokter di cas pa por haci un test. Door di isola e casonan positivo nos por controla e virus y stop e di sigui plama.
