Aña pasa tabata e prome edicion di e “Global Money Week” Aruba. Banco Central di Aruba a introduci “Global Money Week” hunto cu demas partnernan.
Mas o menos 700 mucha di diferente scol a participa na e evento aki, unda nan a siña na un manera interactivo tocante diferente temanan di placa: con pa traha placa, con pa spaar placa, con pa uza placa na un manera responsabel y con pa duna bek na comunidad.
E stacion di duna bek na comunidad tabata e penultimo parada di e “speurtocht” y ta na unda Kiwanis Club of Aruba conhuntamente cu Banco di Caribe y e studiantenan di Colegio San Nicolas a siña e muchanan e importancia pa duna bek na comunidad di Aruba y con pa traha hunto den ekipo p’asina logra nan meta y propositonan. E muchanan a participa na 2 wega popular y na final e grupo ganador a ricibi 2 premio, cual tabata un popchi cu a keda pa nan y e otro premio tabata un moneda. Esaki e muchanan a deposita den un di e 3 cahanan secreto. Cada caha secreto a representa un di e 3 instancianan caricativo, despues di ricibi un informacion breve di nan tur.
E 3 instancianan caricativo ta Casa Cuna, YMCA y Aruba Paralympic Committee (APC). Banco di Caribe a duna cada instancia caricativo Awg. 1000 y Kiwanis Club of Aruba a duna un suma total di Awg. 1,500 cu a wordo reparti den e 3 instancianan.
E monedanan cu e muchanan a deposita den e 3 cahanan secreto a representa con e montante di Awg. 1,500 lo wordo reparti.
Global Money Week 2019 lo cuminsa 2 di april 2019 te 5 di april 2019. Otro scolnan lo haya oportunidad pa experiencia e programma aki.Esaki lo tuma lugar rond di Caya Principal di San Nicolas.
