E noticia di e homber Diego Martijn cu a bay Hospital diadomingo atardi malo cu Coronavirus, a mustra cu henter e protocol no tabata bon hinca den otro. Tabata tin un buraco den henter e protocol. Den un crisis mester analisa e protocolnan of e proceso regular semper. Den bida real e ambulance cu hiba un pashent Hospital no mester hiba e pashent cas bek. Esey ta e regla di traha. Den un situacion actual cu crisis mester tin excepcion. Mester pone cada situacion cu presenta den un balance.
Cada dia situacionnan ta cambia of presenta. Esey mes ta e motibo cu e sistema di cuido a wordo cuestiona despues cu Diego Martijn di Rooi Kochi a ser avisa cu ningun hende por hibe bek cas. For di trempan atardi ta basta yamada nos a haya. E yamadanan tabata bisa cu a mira varios unidad di emergencia tras di otro direccion Rooi Kochi. Bou sirene cu desordo a bay busca e pashent Diego Martijn cu tabata tin problema cu halamento di rosea y ta pashent di Coronavirus.
A hibe Servicio di Emergencia. Dokter a atende cune. A dune su papel pa busca medicamento y bise bay cas bek. Eynan e cos a pega. Famia na cas ta den Quarentena y Ambulance no kier a bin buske pasobra nan no ta taxi. Henter e burocracia aki den un crisis mester por wordo atendi den forma diferente. Na final ora un situacion asina presenta unda cada ken ta laba man, ta riba e minister tur cos ta bin cay.
Minister Dangui Oduber a instrui DVG mesora pa bay busca manera pa e persona yega su cas. Prome cu DVG a yega ya caba e pashent a bay su cas. Su dokter Kenneth Croes y tambe un amigo personal a trece un auto pe. Nan a dune e auto y e mes a logra stuur yega te su cas. E dokter y amigo a escolte y a core dilanti te ora cu el a yega su cas. Asina cu el a yega cas el a bay paden bay sosega. Diego Martijn tabata hopi cansa pasobra e Coronavirus a dale duro. E auto di e amigo lo keda para por lo pronto na Rooi Kochi. Situacionnan asina mester wordo evita. Ademas mester remarca cu 24ora no ta bay transporta ningun pashent. Nos a wordo yama pa bin atende cu e caso pasobra e pashent mes kier a expresa su mes. Esey ta locual nos a haci.
Nos trabou ta pa e informacion yega unda e mester yega. Asina ta evita repiticion den futuro. Asina cu nos informacion wordo divulga e mensahe ta yega y a yudansa ta bin. Pesey nos ta e website di pueblo y ta reacciona tur biaha riba yamada di pueblo. Ora pueblo yama nos tin e deber di bay atende cu cada persona cu kier expresa su mes. Pueblo tin un voz den 24ora.com su existencia. Diego Martijn a conta nos redaccion cu dia 31 di maart el a haci e test. E tabata tin algun dia malo. E no sa unda el a pega cu e virus. E ta cuidando su tanta cu tin cancer terminal. Pa un of otro motibo el a pega.
E tin un familiar mas positivo pero e no tabata den contacto cune. Su famia na cas tambe ta den Quarentena y no por sali por a buske. Dia 31 di Maart a test y dia 2 di April e mes a yama pasobra ningun hende a tuma contacto cune. Despues di mas cu un yamada, finalmente nan a yame y bise cu e ta positivo. Awe tur hende por a mira cu nan mesun wowo con malo Diego Martijn ta y nan a mande cas cu tur e problemanan di salud. Pronto recuperacion na Diego Martijn. Tambe un danki na tur esnan cu a reacciona mesora y kier a yuda pa Diego yega cas. Danki na su amigo y tambe su Dokter Kenneth Croes cu awe el a logra yega su cas.
