Departamento di Impuesto no solamente tin reglanan di cas cu nan empleadonan mester cumpli cu nan pero tambe regla pa bishitantenan. Esaki aparentemente no a cay den bon tera cerca hopi ciudadano, kendenan a bin ta kehando cu ta stroba nan di drenta e edificio di DIMP, si nan ta bisti na short.
Luenne Pieters, director di Departamento di Impuesto, den combersacion cu 24ora.com a bisa di ta hopi satisfecho cu den tur e bishitanan cu DVG y su team a realiza na DIMP a keda constata cu nan ta cumpli cu tur e reglanan di e normal nobo. P’esey e ta encurasha clientenan pa sigui yena e lista di bishitantenan, pasobra esaki ta importante pa contact-tracing si resulta cu un persona cu a bishita e luga a test positivo.
Mescos cu tin reglanan di cas, tambe DIMP tin regla pa bishitantenan, cu no ta nada fuera de lo comun ni extraordinario. Ta pidi nan clientenan pa mantene nan mes na un vestuario cu ta apropia pa ora cu ta bishita un departamento di Gobierno. “Mester bisti di un forma apropia, mescos cu ora ta bay un entiero of un fiesta, bisti di un forma respetuoso.” P’esey e director ta bisa cu no ta aceptabel cu ta insulta funcionarionan publico cu palabra malo, grita of bati man riba mesa. Esaki no por na ningun otro departamento di Gobierno y tampoco na DIMP, of na banconan comercial of negoshi. Ora di bisti tambe ta pidi pa esaki ta debidamente, cu respet mutuo.
Ultimo tempo a ripara cu bishitantenan no ta mantene nan mes na regla y a dicidi di reenforsa e reglanan, pone mas atencion na su cumplimento. “No ta aceptabel pa cana lomba afo, bariga afo, blusanan transparente, pantynan ta mustra, ta cana cu slof, short of saya cortico, shimis sexy y nada di esaki no ta aceptabel cerca nos y tampoco na otro departamentonan of instancianan comercial.” Ta aceptabel camisa, carson, jeans, sapato cera, sandalia, etc. Ta tene cuenta cu cada circumstancia y ta tene tur situacion na consideracion. Ora cu mester ta hala atencion di e bishitantenan, sra. Pieters a splica.
Esnan cu no ta cumpli cu norma ta pidi nan bay cas y cambia e forma di bisti. “No mester rabia cu e miembro di siguridad pasobra esaki ta regla di e departamento.
