DIMAS ta encarga cu diferente proceso pa personanan cu mester di un titulo di estadia na Aruba. Un di nan ta un permiso temporal. E otro ta un permiso pa tempo indefini.
Banda di esey tin declaracionnan, pa hendenan cu no mester di permiso pasobra ley ta stipula asina, por haci un aplicacion pa haya un declaracion di DIMAS, segun directora Kathy Ruiz-Paskel. En total ta cuater proceso cu DIMAS ta responsabel p’e.
Con e ta bay
E cliente ta haci un cita online riba dimasaruba.aw. Riba dia di cita e ta acudi na DIMAS. Na DIMAS e ta entrega e formulario di aplicacion, mas e documentonan rekeri riba e lista di rekisito y eynan, depende si e tin costonan mara na dje of no, e lo haya un payment order y asina e proceso ta start y DIMAS lo atende cu esaki segun dentro di e cuadro cu ley y maneho ta stipula.
E cuadro legal ta stipula den ley. DIMAS ta traha cu e ordenansa di admision y expulsion. Esey ta duna DIMAS e cuadro di ley dentro di cual nan ta traha. Banda di esey, tin e maneho cu gobierno ta delinea y ambos ta riba nan website disponibel. Mas tanto e ley y e maneho, cual ta e instrumentonan cu ta uza ora di evaula cada peticion cu bin na DIMAS.
Si ta un permiso pa estadia temporal y e ta un prome aplicacion, no tin cierto aspectonan cu lo toets si e ta cumpli cu un declaracion di bon conducta. Ta wak si e identidad ta cuadra cu loke ta wordo stipula riba e formulario di aplicacion y si ta bin pa traha por ehempel, ta wak si DPL a duna e OK por medio di un declaracion di Geen Bezwaar cu e persona por subi mercado laboral.
Asina tin mas diferente toetsing cu DIMAS ta haci, sea ta documentonan cu e cliente a entrega of via di e contactonan cu nan ketenpartners pa por valida informacion suministra.
DIMAS ta trata cu e ley y maneho. Esey ta e cuadro dentro di cual nan ta ehecuta nan tareanan. Na momento cu un ciudadano (belanghebbende) haya un decision negativo na DIMAS, e tin recursonan di ley na su disposicion pa por entama un apelacion. Den e apelacion e por trece su argumentonan pakico e ta kere cu DIMAS no a tuma e decision corecto of pakico mester cambia e decision.
Por ta awor si el a logra cumpli cu e rekisitonan cu anteriormente e no a logra cumpli. Esey ta e proceso legal cu un persona tin na su disposicion. Si den e proceso di apelacion e no haya e contesta desea, bolbe haya un negacion, e por acudi na un hues via di un beroep y eynan hues tambe lo evalua si e decision tuma ta corecto of no.
Ultimo añanan e cantidad di permiso a keda fluctua rond di 15 mil pa aña. Tin anualmente un cantidad di peticion cu ta prome peticion y dos tercera parti ta permisonan cu ya caba a wordo pidi den añanan anterior y ta bolbe prolonga esakinan pa keda continuamente legal na Aruba.
Den e ultimo aña e nacionalidad top 5 ta inclui Venezuela sigur, pero Colombia ta keda e peticionario mas grandi.
Di e 15 mil, 10% ta wordo nenga. Den averahe di 2019, por bisa 1500 peticion cu a haci, a haya un contesta negativo di DIMAS. Esey ta debi cu nan no a cumpli cu un of otro aspecto stipula den ley of maneho.
Pa permisonan prome biaha pidi ta rond di 3 mil anualmente. E ta varia di peticionnan pa famia, pa traha, pa rentenier, pa studia. Pa locual ta Venezuela specificamente, locual cu a nota den e ultimo añanan ta cu no semper e personanan por logra cumpli cu e carta di conducta apostilla y si entrega esaki, ora control’e no ta valido. Y un documento valido di biahe tambe, no semper e ciudadano Venezolano por logra cumpli cu e rekisito ey.
Ta rekisitonan den proceso di migracion pa Aruba. E peticion lo wordo nenga si no valida esey.
Contacto cu Venezuela
DIMAS ta valida esaki via websites. Si e cliente no yega y concorda loke ta para riba e paginanan unda cu por haci e control, ta un indicacion cu e documento presenta ta uno falso. DIMAS ta haya varios documento falso entrega den e proceso admision. Como parti di e maneho, no a cumpli cu cierto rekisitonan, e ora e peticion lo wordo nenga.
