E crisis di coronavirus tabatin su efecto riba tur aspecto di bida diario di un persona, di negoshinan pero tambe cerca departamentonan di Gobierno cu no por tabata operacional manera antes. Esaki tabata e caso tambe di Departamento di Integracion y Admision Stranhero (DIMAS).
E Departamento aki cu ta uno cu ta suministra conseho na e Minister concerni, a logra haci algun cambio rapido ora cu e pandemia a surgi y hopi lihe a logra pone e formulario online. “Di e forma aki no a perhudica e personanan cu tabatin cita,” Marilyn Wout, relacionista publico di DIMAS a splica.
Sinembargo no tabatin e medionan na nan alcance pa informa e clientenan debidamente di cambionan cu ta bay introduci. A bini cu un campaña pa splica nan clientenan con ta yena un formulario digitalmente. Pa practicamente tres luna a traha cu un skeleton crew pa atende cu tur e peticionnan cu a drenta. Esaki a trece un retraso den nan trabou, pero a pone un team pa acelera e trabou pa cual por bisa cu awe DIMAS ta up to date.
E mesun team cu a yuda DIMAS caba cu e retraso ta esnan cu ta bin traha riba diasabra pa reforsa e team di DIMAS mes den manda documentonan necesario pa e clientenan. Tabatin hopi documento pendiente cu mester a bay via di email, y awo por bisa cu nan no tin retraso ningun caminda. Nan ta sigui yuda awo den otro seccionnan di DIMAS. Pues pa loke ta registro di e clientenan no tin retraso y tampoco e documentonan cu mester bay pa nan.
