Durante diasabra mainta, IBiSA (Instituto Biba Saludabel y Activo) a organisa un mainta recreativo na e bario di San Nicolas pa e muchanan cu hopi wega masha interesante, asina treciendo un iniciativa positivo pa stimula actividadnan deportivo.
A combersa cu Rodymar Geerman representante na IBiSA kende a splica cu pa medio di nan “Waw Mobile” (Wega ariba Wiel) ta bishitando barionan pa asina por stimula actividadnan di recreacion pa e muchanan. E representante di IBiSA a mustra con e muchanan tawata disfrutando di e mainta cu weganan varia masha interesante
Geerman a mustra cu e programa ta uno amplio cu ta tuma luga riba, dialuna, diamars, diaranson y diahuebs. Durante diasabra ta bishita diferente centro di bario, muchanan ta bon bini pa por participa. Por bishita e “facebook page” di IBiSA pa asina por keda bon informa na cua bario lo ta presente.
Segun e representante di e institucion ta mustra cu “cada pasa un diasabra” lo ta presente na un centro di bario. E programa organisa pa IBiSA lo sigui te final di aña.
Muchanan di tur edad por participa, Geerman a mustra cu en general enfoke ta pa e grupo di mucha di 6 cu 14 aña di edad, pero a subraya cu tur mucha ta bon bin pa participa y ta importante pa por participa na actividadnan recreativo.
Pa por participa ta completamente gratis, “djis yega cu bo smile”. IBISA lo zorg pa e actividadnan y tin instructornan cu lo guia e muchanan pa por siña e weganan.” Pues keda pendiente pa na momento cu e “Waw mobile” di IBiSA ta riba caya, segun Geerman a indica.
Coordinado Bario Unico/Cede Aruba, Gianni Bermudez a mustra di ta hopi contento cu riba diasabra cu e “Waw mobile” ta riba caya y den e caso aki a yega San Nicolas na Centro di Bario Lago Heights. Bermudez a mustra cu por wak hopi mucha hungando diferente wega manera: “skate, basket y te hasta futbol”. E coordinado di e institucion ta encurasha un y tur pa sigui e “pagina di facebook” di IBISA y Cede Aruba cu lo tin e fechanan di actividadnan, si surgi cambio lo informa debidamente.
Actualmente e schedule di actividad ta:
Dialuna: Centro di Bario Dakota
Diamars: Village
Diaranson: Bushiri
Diahuebs: Cura Cabay Zuid
Riba diasabra: Lo varia entre Oranjestad cu San Nicolas
Rhona Dijkhoff cu ta Sales Manager na El Louvre Witec ta mustra cu ta un satisfaccion pa mira e cara di e muchanan cu ta refleha un diferencia. Dijkhoff a mustra cu for di dia cu Elsa Krozendijk a tuma contacto y presenta e concepto, e empresa a kere den e bunita proyecto aki y no a duda pa bisa “si”. “Pasobra ta algo hopi bunita pa duna na comunidad y wak e muchanan ta hunga”. E gerente di benta ta mustra cu nan empresa a pensa cua producto lo por “fit” den e proyecto aki y “Bison” a resulta di ta parti di esaki. E producto lo forma parti di e “Waw mobile” di IBiSA y pronto lo ta introduciendo e “mascota Bison” entre e muchanan.
