E cifra total di detencion pa Toque de Queda di dia 17 di mei tabata 4 detencion. Esaki ta e informacion ricibi for di Cuerpo Policial di Aruba (KPA).
Tur e cuater detencionnan tabata personanan circulando den auto riba camindanan na Aruba. Uno tabata den Dakota (Guyabastraat); uno na Pos Chikito y e ultimo dosnan den bisindario di Tanki Leendert.
Por compronde cu tin anochi cu Polis ta detene mas hende pero no ta tur ta cay bo di Toque De Queda. Por ehempel den caso di ladronicia, accidente, etc.
E prome anochi di Toque De Queda tabata dia 21 di maart ultimo cu a cuminsa cu 27 detencion y e siguiente dia a yega 45 detencion, cu ta esun di mas hopi desde cu a tuma e medida aki den cuadro di COVID-19.
Den e prome luna cu tabata 11 dia a detene en total 242 persona. Hopi hende no a custumbra ainda cu prome cu 9’or nan mester ta cera den cas y cu ni den nan cura nan no por a para of cana.
Den e siguiente luna, april, tabatin en total 274 detencion pa violacion di TDQ y e dia cu mas detencion tabata di 17 pa 18 maart cu 20 detencion en total.
Den e 17 anochinan di luna di mei ya caba tin 66 detencion. Dia 11 di mei a marca historia cu ningun detencion mientras cu te cu dia 17 di mei, e dia cu mas detencion tabata dia 9 di mei cu 8 detencion. Por a nota cu e luna e aki e detencionnan a cuminsa baha y te ainda no surpasa e ocho detencionnan di dia 9 di mei ultimo.
