Diadomingo awo, 10 di october, ta Dia Mundial di Pickleball 2021, cual ta un deporte cu ta hunga paden y ta estilo tennis y pingpong. Den ultimo tempo e deporte aki a bira popular. Pa esaki rond mundo e organisacion di pickleball a dicidi di organisa un competencia, di cual Aruba Sport Unie (ASU) tambe ta haci esey y lo tuma luga na Centro Deportivo Betico Croes.
E evento ta cuminsa pa 10:00 am y ta bay te ora hunga e wega final. Esunnan cu ta bay participa, por pasa inscribi entre 9:30 y 10:00 am. Durante e competencia aki tin dos categoria, cual ta beginner mix y pro mix.
Manera tur deporte na final tin entregamento di medaya p’e ganadonan, mientras cu na final dje weganan tin mini sandwiches y co’i bebe.
Gerald Franca, presidente di ASU, a indica pa inscribi tin un costo di dies (10) florin pa team di dos persona. Tambe ta bende T-shirt pa 25 florin y half caps pa dies florin. Por cumpra esakinan durante dialuna pa diabierna entre 7:30 am y 4:30 pm na ASU, situa den Centro Deportivo Betico Croes. Segun Franca, e inscripcion a habri desde 20 di september.
“Nos ta gradici WEB Aruba N.V. pa nan contribucion n’e evento aki”, el a indica. Pa mas informacion por tuma contacto cu nan na 585-4067 of e-mail [email protected].