Den siman cu a pasa, hoben- y lidernan di mundo a papia riba e consecuencianan di cambio climatico. E alumnonan di VWO-4 di Colegio Arubano, tambe a papia tocante e topico aki y a traha un collage cu nan deseonan pa un Aruba cu efecto climatico neutral na 2050, cu yen di idea pa desperdicio, alimento, transporte y energia den futuro.
Esey tabata un di e actividadnan di e ‘Dia di Colegio Arubano’ riba 20 di september. “Esaki tabata prome biaha despues di hopi aña, pero otro aña elo t’ey atrobe”, asina juffrouw Van Loon, rector di e scol a bisa. “Tabata fantastico pa mira con creativo, entusiasma y involucra nos studiantenan y docentenan ta.” Pa cada nivel a organisa un programa separa, e.o. speurtocht den Playa, actividad deportivo na San Nicolas y Mangel Halto y sesion di yoga.
Colegio Arubano ta celebra 60 aña di existencia e aña aki, y p’esey a organisa actividadnan pa esnan directamente envolvi cu scol. Riba diasabra, 23 di november proximo, lo tin un reunion pa ex-alumno, cu presentacion di Robert y su Solo Banda Show y Tsunami hunto cu diferente DJ. E recaudacion di e reunion ta destina pa mantencion di e edificionan di scol.
