Despues cu ayera alrededor di 5:00 pm cuater Tribon a yega nos isla, awe un grupo di tres piscado a sali pisca. Nan a sali den e boto Teaser, cu capitan Marcelo Heyden hunto cu e piscadonan Kyle Richardson y Richard Flanegin. Nan a logra pisca entre otro Capita, Picuda, Bonito como tambe un Tribon basta grandi.
E piscadonan a conta cu e dia a bay bon pa nan, nan a logra gara algun Carañito grandi tambe. Riba e boto Teaser tabata t’ey tambe un famia turista, consistiendo di un tata cu tres yiu. Ta conoci cu algun especie ta protehi, sinembargo esaki no. E especienan protehi aki na Aruba ta e Whale Shark, Great White Shark y e Great Hammerhead.
E biologo marino, Byron Boekhoudt, a confirma na nos cu tribon sa yega costa regularmente. No ta nada straño esey. De facto, lama ta nan cas. Ta nos, hendenan, ta bin stroba nan habitat. Locual nan ta haci ta busca cuminda pa come. Y e habitat di yerba cu tin na altura di Divi Beach ta ideal pa nan cuminda y refugio.
Ta kere cu e tribonnan cu a yega Aruba awe ta di e famia conoci como “Caribbean Reef Shark”, aunke cu nan nomber original ta Carcharhinus perezi. Por topa cu nan den lama tropical for di e estado di Florida di Merca te na Brazil. Pero mas comun, ta topa cu nan specialmente den lama Caribense, pues aki banda.
Cientificonan ta sigura cu nan por crece y yega te cu 3 meter largo, o sea 9.8 pia. Ta bon pa bisa cu e Caribbean Reef Shark ta un di e piscanan, considera como “roofdier” di mas grandi den nos ecosistema. Nan ta come specialmente pisca chikito, pero tambe otro “large crustecean”, esta cangreu, como tambe pulpo, squid y otro cephalopods. E tipo di tribonnan aki ta reproduci cada pasa un aña y ta haya 4 pa 6 yiu.
Di otro banda, den Caribe nan ta masha popular como alimento pa turistanan mes, cu ta come tribon, ta uza nan cuero, nan azeta di higra, etc. E tipo di tribon aki ta prefera lama seco, pues no mucho hundo, por lo menos no mas hundo cu 30 meter di profundidad. Ta topa nan paden di rif, cerca di coralnan. Aunke cu a yega di topa e mesun especie aki di tribon landando den lama cu profundidad di 378 meter tambe, pues nan sa varia.
