Diadomingo anochi alrededor di 10:20 pm polis a bay atende cu Umbrella Lounge Bar pa falt’i cumplimento di regla. Hopi hende riba otro y sin tapa boca. Durante cu polis tabata bezig cu e asistencia na e dicho bar cu ta keda net patras di Censo den Playa, un di e agentenan a tuma nota di destruccion na e aut’i polis.
Ora a bay wak mas di cerca, a resulta cu a destrui e porta banda robes, pues di chauffeur. Prome a kere cu a tira e patruya cu baranca, despues ora un superior a yega na sitio, a constata cu ta trata di un tiro. E analisa e perforacion y a saca afo mesora cu ta trata di un tiramento. No por confirma si a tira cu arm’i candela of cu scopet di aire.
SEGUN EXPERTO
Den combersacion cu un experto, por analisa cu por wel di ta cu a tira cu arma di candela. Probablemente e bala a “scharmaai” e port’i patruya y sigui, ta cuadra tambe mirando cu e bala no a bora e porta. E agentenan a busca varios rato na e sitio di incidente, asina yama plaats delict pero no a topa cu ningun bala cayente.
Un rato despues, recherche tambe a presenta na sitio pa investiga e area y cuminsa cu e proceso penal. Tin cu agrega si cu, den e area tin varios edificio cu tin camera di siguridad, pues esun cu a tira por spera bishita di Team di Aresto den e proximo dianan nos dilanti. Tur esaki mirando cu lo considera e futuro sospechoso como “vuurwapengevaarlijk”. Ora ta sospecha cu un persona tin arma di candela den su poder, ta haci uzo di e Team di Aresto pa ora di detencion, e team aki ta specialisa pa tipo di scenarionan asina.
