Relaciona cu desaroyo riba e caso di Flamingo, a drenta informacion cu tin un detencion mas cu a tuma luga awe mainta. Ta trata di yiu homber mayor di ex- minister Otmar Oduber.
Detencion di Jeandrick Oduber a tuma luga. E ta na e momentonan aki den interogacion na Landsrecherche caminda cu e tin cu pasa door di procedura relaciona cu e caso, caminda cu su tata ta e sospechoso principal.
CASO FLAMINGO
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bao guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delito di corupcion y otro hecho castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche ordo na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
